Stella Yeung 反轉香港3D美術館
更新日期: 2016 年 06 月 10 日
韓國嘅3D館我就去過兩間，但香港嘅3D館就未去過啦~
上星期放假心思思走咗去山頂嗰間，我見山頂依間話係堪稱韓國3D館始祖，引進香港，所以就去睇下係咪真有其事，因為香港都有好幾間3D館，但我睇到人地影啲相同韓國嘅燈光有啲出入，所以影出嚟唔係咁似，到底山頂個間會點呢？
售票處旁邊已經有3D畫同公仔俾人影相... 有無覺得啲人物公仔好熟口面 ?!
記得我去韓國3D館都係依幾隻公仔 HAHA
入去睇梗係買門票先啦，大人$130，如果你生日當日去可以免費入場㗎~
佢開放時間係朝10晚10，啱晒我夜晚出動HAHA～我當日都係夜晚8點幾先入場
Trick Eye入面佔地大約7千幾呎，對於香港嚟講7千呎都算大㗎啦，全場共分咗5大主題展區，包括：「秘密花園」、「名畫世界」、「大冒險」、「夢幻樂園」、「探索香港」。我數過一共大約70個影相位，就係叫錯視技巧的展品啦HAHA～
其實我好鐘意玩3D館，因為可以影啲kai相，真係好開心㗎，記得之前去韓國玩到出晒汗！唔講咁多，俾啲相你哋睇下我表情有機豐富啦~
「秘密花園」顏色比較柔和，以仙景、湖水為主
比較重口味，加上骨子裡充滿喜劇細胞嘅我，好快就過咗隔離主題啦，哈哈～
「名畫世界」我就玩得高興又愉快啦，因為夠KAI！呵呵～
我都唔知依PART代表咩，但見我隔離個美女SHOW長腿我咪學下佢囉～
「名畫世界」我最鐘意依張...如果嗰日我係著夏天衫就超級似，我動作係咪好Match呢？HAHA～
「大冒險」
我：「前面個車手先生你好蠢蠢豬唔望鏡頭喎，攝影師影緊我哋啊，想紅就靠今次啦！」
前面車手：「......」
「大冒險」最辛苦就係依個啦，但真係100%似啊～我真係好似凌空咗咁～
「夢幻樂園」有2、3個係跟韓國熱門主題，依個係其一個啦～但得我一個影好似無咁搞笑喎...
依個韓個都有類似，真係好似爬咗上棵樹 HAHA～
最後一個區就係「探索香港」，依一個都係Trick Eye HK主打嘅主題，
係幾特別嘅... 但我都係覺得「大冒險」、「夢幻樂園」嗰啲開心啲...呵呵～
依個到底係香港咩地方呢？大澳？雖然隻怪獸好似唔太關香港事，但依啲相係幾搞笑嘅～
每一個影相地區嘅地下都有一張「最佳拍攝點」貼紙，提你點影啱角度。
玩咗大約個幾兩個鐘，我覺得香港依間原來都唔算話大，如果同韓國相比只有韓國嘅一半，元素同每一區嘅展品都無韓國咁多，喺香港地方細，咩都係細啲㗎啦，不過燈光同展品嘅質素同韓國係一樣嘅，一樣有好多一個個立體公仔或者好多前後對俾我地企係入面影相，影出嚟都幾似㗎，唔係下下都係平面畫，算係咁啦，都值得一去嘅。玩完3D館又可以行下山頂，夜晚又可以睇下夜景，都可以幾浪漫㗎～
仲有，生日當日去Trick Eye所有地區分店都唔洗錢㗎~
韓國嘅首爾、釜山、濟州所有分店、新加坡、香港、中國濟南都可以用到依個優惠！
香港Trick Eye特麗愛3D美術館
地址: 香港島山頂山頂道118號山頂廣場3樓1號鋪
時間: 10AM - 10PM
電話: (852) 2813 1686
費用 : 成人$150 長者/小童 $100 (官網預訂有9折優惠, 可以使用信用卡)
網址：http://trickeye.com/
如何前往:
從中環花園道的山頂纜車站，乘搭山頂纜車登山，車程約10分鐘。（前往纜車站，可於中環天星碼頭外搭乘15C號巴士；或於港鐵 中環站J2出口，步行10至15分鐘前往。）
於中環交易廣場的巴士總站（港鐵香港站D出口）搭乘15號巴士，至山頂下車，車程約35分鐘。
於港鐵香港站公共運輸交匯處，搭乘1號綠色小巴，至山頂下車，車程約25分鐘。