PopCorn自住月租 同價$18,000

PopCorn自住月租 同價$18,000

相關信用卡:

PopCorn自住月租 同價$18,000

發表日期: 2016 年 12 月 12 日 更新日期: 2016 年 12 月 12 日 生活

作者:August Amber

大台《東張西望》主持李潤庭趁老婆離港,搭地鐵帶小三返屋企happy,本來已經好大膽,查實佢仲曾經喺近住電視城嘅PopCorn商場飲咖啡同小三談情,態度親暱,更摸對方手仔,完全唔記得自己奀星主持身分其實已經入咗屋。李潤庭可能因為PopCorn近返工嘅地方而選擇喺度談情, 其實有冇諗過買入或租住商場上蓋屋苑「天晉」談情?咁就唔使喺公眾地方咁明目張膽啦!

▼PopCorn商場係天晉嘅基座,人流多,公眾人物喺度偷情,一係蠢,一係專登

非奀星能負擔

天晉有4成單位係實用面積500幾方呎嘅兩房單位,依家呢個時勢嚟講唔細架喇。屋苑11月實用呎價$14,500,所以最細500幾方呎嘅單位,入場費起碼過$700萬,真係唔係一般做主持嘅奀星可以負擔得起,所以「被迫」喺PopCorn商場談情,某程度上筆者都要講句「I know that feel, bro」。

▼天晉11月實用呎價$14,500,10月係$14,972,為全年最高位。

入場費$700萬

咁如果真係要買天晉,價錢最低嘅單位要幾錢,月供要幾多呢?

上文講咗天晉入場費要$700萬,但筆者喺美聯網搵到個一千零一個叫價僅$670萬嘅單位,實用534方呎,實用呎價$12,547,比巿價平$2,000,係屋苑筍盤!但因為單位超過$600萬,最高僅做到6成按揭,假設按揭利率為2.15%及供30年,首期就要畀$268萬,月供$15,162,月入$36,600先過壓力測試,都幾貴吓!計埋差餉同管理費,自住嘅開支每月要$18,000。

天晉唔計兩座酒店,有6座住宅大廈,共1,028個單位。據美聯資料指,1座嘅入伙日期為2011年8月底,至今樓齡為4年,算係新樓,整體屋苑11月成交量有9宗。

▼呢個單位叫價已經係最平,但只可做得果6成按揭,想買天晉真係唔易

最平月租萬八

唔知各位有冇睇李潤庭個認錯記者會,佢就話喺佢偷情一事曝光前,正印老婆已知佢出軌。依家婚姻幾近破裂,李潤庭仲夠膽講話選擇權完全喺佢老婆到,對方可以選擇離婚或繼續「喺埋一齊」!筆者想質疑,你既然話錯晒果個係你,偷食一事更已通天,係你一手令你哋2人嘅將來冇得選擇囉,依家一句可以離婚,就係畀老婆嘅「選擇」?不如轉行做棟篤笑啦,夠晒黑色幽默!

話雖如此,唔好理李潤庭幾賤先,唔想未寫完呢篇文已經咁勞氣。

各位想住天晉,真係除咗買之外,仲有租呢個選擇。

據美聯資料,屋苑11月嘅放盤實用呎租叫價係$40一呎。筆者搵過所有地產網,個個單位月租起碼$20,000起跳。不過幾經辛苦,筆者搵到天晉二期一個實用550方呎兩房低層單位,月租叫價只係$18,000,實用呎租只係$33。二期喺2014年9月落成,樓齡只係2年!

▼相對嚟講PopCorn位置都算近TVB,唔通李潤庭覺得最愈危險地方愈安全?

睇定先入巿有着數

天晉未起完架,屋苑IIIA期剛剛落成,即將入伙,而IIIB座則下年第1季落成。上星期五特首梁振英宣布唔會競逐連任,地產股即升,唔知未來香港特首換人或環球經濟、美國加息等會點影響樓巿,如果想住新樓,可以暫時忍吓手,睇定啲,等幾個月新樓入伙,啲單位裝修好再考慮或租或買,始終買樓同租樓都係大事。

好喇,天晉租買行情都講完喇,可以講返少少李潤庭單嘢。佢今次畀狗仔隊影到點偷情,其實幾「高調地低調」,而值得注意嘅係,小三原來本身係人妻,老公仲要係上巿公司執董,身家應該唔少囉,老婆偷食,老公點忍?所以李潤庭可能藉今次事件,畀小三同佢老公攤牌!

李潤庭今鋪好大機會有排都唔會再喺電視上出現,自己同小三快要同正印離婚,小三身家豐厚嗎?如果身家唔錯嘅,李潤庭嘅劇本會唔會早已寫好?如果係嘅話,失業又失婚嘅「雙失」又如何?高章!