MSCI到底有咩咁巴閉？

股票市場早兩日萬眾期待，為了今早MSCI明晟公布會否將A股納入新興市場指數，結果就係「未得住」，到底咩係MSCI明晟？呢個行為點解有咁大影響力呢？

MSCI中文前稱摩根史丹利資本國際公司(Morgan Stanley Capital International)，明晟是其大中華區官方名稱。MSCI明晟編制多種指數，是基金投資的指標。若納入A股，相關股份會進入國際級機構投資者的視野，邏輯上令股份估值更具認受性，對炒鬼來講是個炒作良機，所以市場咁大反應。

不過，「你而家無，但將來會有」，MSCI明晟董事總經理和全球研究主管Remy Briand講到明會與中證監成立工作小組，為打算開放資本市場的中國政府提供建議，會研究解決額度分配、資本流動限制和實際權益擁有權呢啲國際投資者的主要顧慮。MSCI明晟一般每年6月公布檢討結果，今次就話「如有顯著進展，可能在明年6月前作出新公布」。

一旦MSCI明晟納入A股，初步會吸引大概20億美元資金追蹤，由於A股市場未算開放，所以指數股票型證券投資信託基金(ETF)最為著數，ETF一般追蹤一個特定指數的成份股，該指數升，相關ETF會跟上。在港上市的ETF有股友都好熟嘅安碩A50中國(02823)同南方A50(02822)，當MSCI明晟納入A股，就會吸引國際級機構投資者買入這類ETF。

另一方面，當然唔少得「滬港通」同「深港通」，唔好咁天真以為真係為香港搞兩壇咁嘅嘢，從來目的都係吸引外資流入A股，由於外國投資機構對A股認受未算好普遍，所以現時北向額度資金流動好少。可見嘅將來成交一定急增，學李小加講，額度限制可能會取消。

講下講下，香港得到啲咩？主要係金融可以賺多啲手續費咁。香港人，唯有喺旁邊跟炒下，呢啲錢唔賺真係對唔住自己。