Merry Christmas~@ 外賣篇

平安夜有得早放係恩典，冇得早放係道理，想唔洗番工？發夢啦！既然要番工係不變嘅事實，大家不如用心揀個着數聖誕派對外賣，同同事食餐Happy Christmas Lunch啦~ 其實宜家唔少餐廳都做緊聖誕派對外賣優惠，早D預訂仲有更抵嘅折扣優惠添~

意粉屋 / spaghetti 360
訂餐之前我地先要搞清楚一個好現實嘅問題：「邊個埋單先？」如果係公司萬歲嘅話就唔洗諗咁多喇，一於食豪D！好想試意粉屋 / spaghetti 360「星級滋味套餐」（14-16人用）（見下圖）呀，有香草海蝦、蘇格蘭煙三文魚鮮果沙律打頭陣，再嚟法國鵝肝醬x紐西蘭青口拼盤、香草烤羊架配新薯塊、焗龍蝦汁小龍蝦魷魚墨魚汁飯同埋其他小食喎！哇，又鵝肝醬又羊架又龍蝦又三文魚咁，真係睇見都流晒口水呀！當然，話明星級套餐就緊係唔平啦，依個餐原價$3,352，不過作為員工嘅我地都唔好咁過份，就盡下綿力幫公司慳錢啦，喺12/18前用Citibank卡 / 渣打卡訂餐有8折優惠架，即係話可以優惠價$2,681訂餐。（如果冇得入公數，$2681/16嘅話位位都係$167左右姐，都食得過呀~）

除左「星級滋味套餐」之外，其實都仲有「意式聖誕套餐」（12人用）（見下圖）依個選擇（一樣係用Citibank卡 / 渣打卡找數有8折：$2,406*0.8 = $1,925），但係計計數，如果AA制每人都要夾番$160左右，頭盤同樣有香草海蝦、蘇格蘭煙三文魚鮮果沙律，仲有星級醬燒珍寶豬助骨同芝士焗肉醬闊麵等等嘅主菜，倒不如湊夠16人，每人比多$7食好D。

Oliver's Super Sandwiches
如果人唔夠多，其實都仲可以考慮碌Citibank卡訂66折嘅Oliver's Super Sandwiches O' Grace聖誕派對外賣套餐（折後$840，6-8人用），平就夠平喇，不過個人覺得個餐亮點不足。所以我會建議不如每人食多少少，叫一樣係66折嘅O' Amaze聖誕套餐（折後$1,350，10-12人用），有墨西哥卷拼盤、德國鹹豬手、意大利風乾火腿等等嘅美食算係咁啦~