iPhone 6放機指南
iPhone 6放機指南
相關信用卡:

iPhone 6放機指南

發表日期: 2014 年 09 月 22 日 更新日期: 2014 年 09 月 22 日 購物
作者:炸雞波

經過咗3日iPhone 6 Reserve,特別係星期六大開倉,而之前Apple Online Store預售亦陸續派貨,唔知各位有冇機喺手呢?由於理論上每人可以訂兩部,所以除咗自用之外,有唔少人都會買多部,甚至幾部嚟放售,當係出雙糧。

要放機,相信最多人會選擇去旺角先達廣場,每年Apple出新產品,先達就迫到行花市一樣。先達入面好多手機舖都收機,放機可以慢慢格價,價啱先放。如果放開咗封嘅上台機,有啲舖都唔扣錢,有啲會扣幾十至幾百不等,又係要格價。而有啲舖頭門口貼紙或者白板寫咗收機價,或者網上報價,亦未必反映當時實際價錢,要向店員問清楚。而先達旁邊百老匯門口都會聚集咗一列流動手機檔,通常佢哋個價會比先達場入面低$200至$300,不過問下都無妨嘅。


去先達放機,其實都有時間性,星期一至五價錢會比較穩定,星期六、日可能會低少少,有人話因為銀行唔開,舖頭要就住手上現金收機,所以壓低啲個價。同埋夜晚價錢亦會低啲,因為夜晚收機收得七七八八,現金唔多或者當日收夠數,有時停收亦都係因為呢個原因,第二日就會繼續收。

除咗先達,可以試下去各大討論區嘅買賣專區搵下有冇用家或者手機舖收機,某些手機舖可能突然需要某款型號,會出高少少價。當然亦可以留言話有機放售,不過而家咁多人有機,有好多放機Post,所以都係主動搵下買家會好啲。但要留意買家評價,睇下有冇其他人約咗交收但被放飛機。

另外由於香港iPhone主要係供應俾大陸,所以有人諗到北上深圳集中咗數碼產品商城嘅華強北路放機,例如主要做手機買賣嘅遠望數碼商城。的確,華強北收機價計埋匯率,係會高過香港幾百至二千蚊,因為香港手機舖都要賺錢(至於食水深唔深就見仁見智),同埋要扣除運輸費。遠望數碼商城入面好似先達咁,好多櫃位同舖頭,可以慢慢問價。如果各位擔心假銀紙問題,可以問下有冇直接入數落大陸銀行戶口,過咗數先交貨。亦可以試下企係大門口揸住部iPhone,自然有人嚟問價。

到咗深圳坐地鐵去華強路站或華強北站就去到遠望數碼商城。

大陸報價紙,不過通常係批發或零售價,而唔係收機價

不過大家唔好咁開心住,因為攜帶數碼產品入境,而佢有理由相信你唔係自用的話,係要打稅,數碼產品就係10%,即係一部iPhone 6最低要交$500人民幣,計埋車錢,除非差價真係好大,否則最後獲利其實同香港差不多,重要花時間上去。同埋大家唔好諗住搏一搏唔申報,唔申報即係走私,被截停搜到,除咗要交返稅同罰錢,仲可能會扣留你啲機,因為而家各口岸都Check得好嚴,所以大家都係諗清楚先去。

成日有人問:「到底個價會唔會升?應唔應該Hold機?」我真係唔識答,每個人心目中對「賺」嘅定義都唔同,有人一部賺一千幾百就滿足,有人每部賺咗三千,個價升多一百都覺得蝕咗喊晒口,而且價格每日都變,升價跌價邊個睇得透?除非你做莊啦。所以總之問到啱心水嘅價就放。