iPhone 5S與5C來了？

香港人有舖「炒嘢癮」，限量版啦、演唱會票啦、Figure啦、iPhone啦，乜都有得炒一餐，不得不自誇一下：我地好有生意頭腦呀！萬眾期待的蘋果發佈會9月10日來了，Lady C. 我當然都好關注iPhone 5S與平價iPhone 5C會否一同登場啦！雖然我已經重申好幾次我打算出機自用，但身邊仍然有好多人想同我討論：「今次新iPhone有冇得炒？」好啦好啦，我就膽粗粗發表一下自己意見啦！

要講有冇得炒，應該先講講iPhone 5S與5C既規格先。如無意外，今次兩部新iPhone外觀將不會有太大改變，有傳iPhone 5S除了黑、白兩色，還設有香檳金色，而手機的長、寬和高則幾乎與iPhone 5完全一樣。傳聞又指，iPhone 5S將使用A7處理器，運行速度將比使用A6處理器的iPhone 5快三成！而且更有指紋辨認功能，用家可以指紋解鎖iPhone 5S，夠哂Cyber！問題係，單係變色同加快處理器速度，並唔算係咩大突破，更不足以令已變心的果迷再重返Apple懷抱，所以首先於「求」呢個層面上，Lady C.我覺得係相當唔樂觀。

傳聞中既iPhone 5S同疑似指紋掃描器

至於盛傳走平價路線的iPhone 5C(傳聞價格定位在$3,000樓下），規格、功能「外洩」資料唔算多，只知「膠感」十足，用上多彩烤漆圓角背蓋及防刮花設計，顏色選擇包括白、黃、綠、藍、橘，機身很可能略比iPhone 5厚。站在手持聲稱保值能力高的iPhone 5面前，除非壞機，不然Lady C.我實在望唔透5C有咩本事引到舊機主出手。加上iPhone 5C既顏色選擇又多，炒家要準確預測市場喜好入貨，相信難度十分高。

盛傳「膠感」十足既iPhone 5C

總括而言，Lady C.我認為iPhone 5C同5S唔係冇得炒，但係只限開賣首一兩日。唔好唔記得仲有一個重點：蘋果今次會破天荒幾乎同時在內地舉行新iPhone發佈會，香港與內地開售時差不再，想靠時差伺機炒機？小心炒燶機損手呀！

但如果唔係一心想炒機，只係想買部返黎過下手癮，賺少少信用卡積分回贈或者當碌大額儲飛行里數都幾好。提一提大家，簽帳之前記得睇清楚條款，事關有部分信用卡有列明Apple Online Store不屬於網上簽帳，亦有一些商戶推廣言明優惠不包括Apple產品。講開優惠，雖然Lady C.我暫時未有渣打信用卡，但係都留意到佢出左個現金回贈推廣，只要喺Apple Online Store出兩部5S左右(因為有限要單一簽賬滿HK$10,000或以上)，就可以有$150返手，計落叫做打左98折咁上下，唔多，但好過冇。

 （PS: 該推廣計劃只適用於首15,000名登記之客戶，唔知而家登記名額爆滿未呢？ ）