Hi~ 里數(五)：儲里數……點少得呢張卡？

好幾位朋友問Lady C.呢排深潛左去邊度玩，我係度鄭重答一次：我都想去玩！年尾特多野做係慣例，但我都記得要找數(文)。

之前里數第三篇提過，最近儲里數主打卡有新選擇，第一篇提過既DBS Black World MasterCard唔再係本地零售簽賬既首選，簡單少少黎講，我要更新一下儲里數既碌卡組合。

本地零售簽賬建議組合：
渣打American Express信用卡 + 匯豐信用卡 + 富邦白金/Titanium信用卡 + 6:1信用卡*
*包括DBS Black World Master、DBS Black American Express、Citibank Prestige、交通銀行銀聯雙幣鑽石卡(需單一簽賬滿$300以上)

自從重新開放申請後，渣打AE卡本地簽賬$5 = 1里，可謂平日最宜碌！而且出卡頭兩個月簽滿$10,000可得15,000里迎新，簽賬要求與回報CP值算高！只可惜呢張係AE，有部分地方唔收唔夠方便，同埋除左頭兩次換里數手續費免左，之後都要收$300一次……所以如果唔係出新卡，要唔要用$6 = 1里既卡取代之，就要慎重考慮喇！另外，都有幾項消費係唔建議用呢張卡碌既，就係網上購物、繳費、八達通增值同食飯喇！

大家可能好奇怪點解連食飯都唔用呢張卡碌，事關有匯豐6X最紅自主獎賞嘛！Lady C.我覺得咁多個獎賞類別，實用程度極高既莫過於「賞滋味」，唱K睇戲同買衫唔係日日都會，但飯就日日都食！打工仔一族相信無論如何一星期都有超過3餐係外面食掛？全港食肆都包6倍，計返條數即係差唔多簽$2.78 = 1里。

不過當然，如果覺得自己去超市簽賬又多又密，選「賞家居」都唔錯(碌卡買路姆西毛公仔應該都有里數可賺)；又如果係經常性返內地出差，或者中港兩邊走已係日常生活之一，選擇「全押」係「賞中華」類別都係個好選擇。只係，匯豐用獎賞錢換里數係收手續費既，每年收返$300元或者要一次性交$300獎賞錢換，抵唔抵換就真係視乎有幾大額要兌喇……(基本上除左DBS、Citibank之外，大部份換里數都要收費)。


記得第一篇提過，富邦白金/Titanium卡送50,000分(約4,167里)個迎新凡到11月30日就完，其實富邦銀行網站已經將呢個優惠延期，去到下年3月31日前申請都仲有。點解要特別提呢張卡呢？Lady C.我覺得係無論如何都要有張在手，無論係海外簽賬，抑或係網上繳費都一樣咁實用！儲里數……點少得呢張卡？