C君月搵10萬 先夠供Dream house結婚

組合農夫嘅C君至今未婚，但已名草有主，打算買貝沙灣海景豪宅，同女友拉埋天窗，但佢坦言未有能力實現呢個買樓夢，依家租住荃灣千呎單位先。貝沙灣唔少明星居住，佢想買樓同佢哋做鄰居，就首先要過千萬首期，仲要每個月搵夠$10萬先夠供！

 

打算買貝沙灣結婚

 

農夫入行時冇後台，冇唱片公司力捧，陸永試過窮到戶口唔夠$100，C君就試過戶口2個月維持得嗰$3.8，買樓，當時對於佢哋簡直係天文數字。不過隨着2人愈嚟愈紅，前年拍攝大台《Do姐去Shopping》嘅搞笑表現，工作愈接愈多，做埋大台選美節目司儀，收入大增，當然會畀人問幾時買樓啦。

拍檔陸永早已結埋婚生埋2個女女，C君都有傳快要同拍咗拖2年嘅港台DJ黃天頤拉埋天窗了。C君舊年搬離西貢南圍嘅村屋之後，就花月租$3萬，租住荃灣「壹號九龍山頂」過千呎單位，「畀女友住好啲」，未來目標係買貝沙灣海景豪宅同結婚！

 

▼買得起貝沙灣千呎海景單位嘅人，都係非富則貴

 

月搵10萬至夠供

 

但貝沙灣整體實用呎價成$2.3萬。如果唔想住得細過荃灣，又想貝沙灣單位有海景，筆者搵過，符合C君條件嘅千呎單位，售價$2,300萬起跳！C君坦言呢個買樓夢仲未可以達成，但如果要達成嘅話，佢首期要畀幾多，每個月平均搵幾多錢先夠供呢？

 

$2,300萬嘅單位，由於售價過千萬，所以只能做到5成按揭，即係C君起碼要有$1,150萬首期！而假設佢供足30年嘅話，月供要$43,374，每個月搵$10萬先過到壓力測試。唔好唔記得，喺儲緊首期嘅時候，佢每個月仲交緊荃灣嗰$3萬租，都幾吃力喎。

 

▼自從拍攝《Do姐去Shopping》之後，農夫就同鄭裕玲做咗朋友，收入亦大增

 

前女友悔婚

 

唔好以為C君可能快要好事近，佢情路上一直走得輕鬆，查實喺2012年，本來要娶拍拖6年嘅圈外女友，但有傳對方怕C君嘅地中海貧血症會遺傳下一代，突然悔婚，C君傷心咗好一排。

依家C君演藝事業發展得唔錯，仲有機會買豪宅結婚，DJ女友黃天頤可以話執到筍盤啦！

 

▼C君女友、港台DJ黃天頤