Asia Miles換票路線之日本九州篇

除咗熱門嘅東京同大阪，近排愈來愈多人留意到九州～其實我鍾意九州多過東京，景靚唔使講，仲有超級nice嘅九州人，不論搭車食飯都會有人主動同你傾計，甚至請食飯。呢篇就用九州做膽，講下點用Asia Miles換九州機票同埋點玩埋其他地方。

首先重溫返Asia Miles兌換機票條款：可以於起點、轉機點或者回程點做兩次中途停留(2 stopovers)、兩次轉機(2 transits)同埋一次終斷行程(1 open jaw)。

中途停留(stopover)：喺某城市逗留超過24小時直到下程航班開去另一城市。
轉機(transit)：兩程航班之間時間相差唔超過24小時。
終斷行程(open jaw)：指出發城市同返回城市不同。如果喺起點終斷行程，就必須返回起點國家，但毋須是同一城市。

望望九州地圖有返個慨念先：

北九州：福岡、大分、長崎、佐賀
南九州：熊本、宮崎、鹿兒島

1. 香港－福岡－香港
最簡單係來回位於北九州嘅福岡，需要30,000里。不過同樣里數可以飛埋更多九州城市、甚至去埋沖繩等等其他城市，loop落去繼續睇啦～

CX經濟客位需要里數：30000

2.香港－東京－九州－香港
喺羽田停留／轉機，再飛去喺南九州嘅鹿兒島，然後由宮崎、熊本開始玩返上去北九州。日本鐵道控仲可以試下搭蒸氣火車SL人吉上返北九州，玩晒7個縣之後由福岡返香港。

CX經濟客位需要里數：30000

3.香港－九州－東京－香港
同2.差唔多，不過今次就由北九州落返去南九州。

CX經濟客位需要里數：30000

4. 香港－東京－九州－大阪－香港
呢個路線可以玩齊東京、九州同大阪。開咗個open jaw畀大家自己選擇點由南九州(鹿兒島)上返北九州(福岡)，途中可以去埋宮崎、熊本、大分，如果想征服晒九州7縣就要預時間畀福岡隔離嘅長崎同佐賀喇～

CX經濟客位需要里數：30000

5. 香港－九州－沖繩－香港(一)
喺九州外島嘅沖繩同九州本島好近，所以大家都可以利用2個stopover順便去沖繩。如果沖繩同香港嗰程好難換，可以喺大阪伊丹轉機返香港。

CX經濟客位需要里數：30000

6. 香港－九州－東京－沖繩－香港(二)
客服話鹿兒島去沖繩冇直航提供，不過可以喺羽田轉機過沖繩。如果有時間可以停留東京先再出發沖繩。

CX經濟客位需要里數：30000

里數方面，我用Asia Miles官網計算機計。不過理想歸理想，現實係可能會因為航班日子等等原因而有變數，最好打去hotline問問啦:)