AIYA哎呀祖琪 之 帶你玩用腳踢嘅桌球
更新日期: 2016 年 03 月 14 日
我同琪都咁好動，平時就最鍾意去玩架啦，尤其是一啲要郁身郁勢嘅運動。桌球大家就玩得多啦，用腳踢嘅桌球你玩過未呢？我同琪就去咗Ball room試玩，原來都幾易上手，我覺得仲好玩過平時嘅桌球。Ball room有觀塘同荔枝角兩間舖，我哋去嘅觀塘就係總店。
玩法同美式桌球差唔多，分成兩隊，大家打晒屬於自己對顏色嘅球之後，最後可以打黑波入洞就為之贏。當然啦，打咗白波入洞就梗係輸啦。
一開始玩嘅時候覺得有啲難，可能我渣，不嬲都唔踢波有好少做運動， 覺得自己好似冇乜球感。但係玩玩下，覺得好好玩，原來唔係好難，因為唔使好少玩足球咁衝力射球。 最重要係同隊友溝通，大家商量下策略。
其實呢個亦都係一個可以運用創意嘅遊戲。除咗用腳踢之外，仲可以用頭，手踭，肚同屁股...總之你諗得出嘅部位都可以架。
用屁股撞又得。
用頭頂亦得！
除咗好似平時玩桌球咁，桌上足球嘅特點就係融合咗足球嘅元素，所以大家可以傳球比隊友，轉身射個三分波，大家可以訓練下默契，又可以當做運動，係咪一舉兩得先。
結合足球同桌球兩種玩法，都幾好玩喎。
負責人Kase話比我哋知，佢同另外兩個朋友成立Ball room係因為見到依家時下年青人成日掛住玩電話或者打機，好少機會同朋友真正地交流。佢希望呢個地方，可以作為一個空間俾多啲年輕人互相認識。
順便一提，負責人Kase真係好好人又健談，大家下次嚟到嘅時候，都不妨去搵佢吹下水，大家互相交流下!
收費：
每人每小時＄35
桌上足球包場＄150
地址：
總店:官塘興業街14號永興工業大廈12樓C1室
分店:荔枝角長沙灣道883號億利工業中心4樓417室
付費方式：
現金
