A股災後重建
A股災後重建
相關信用卡:

A股災後重建

發表日期: 2015 年 07 月 22 日 更新日期: 2015 年 07 月 22 日 生活
作者:任以風

滬指最近幾日尚算穩守4000點,市場都開始聚焦阿爺點收科,阿爺最近亦頻頻出手。無論如何,香港經濟地位喺大中華區中短期提升係無懸念。


先跟進返大家都嘖嘖稱奇嘅「惡意沽空」調查進展(沽就沽,邊有分惡意善意!),公安部正調查涉嫌操縱證券期貨交易,包括上海自貿區部分公司。好啦,公安老粗大搖大擺走去拉人,呢個籌備咁耐嘅示範區仲有咩公信力?「嗱,你嚟做生意啦,不過由於我地門戶開放,你啲外匯可能俾我拎去炒股,阿爺唔鐘意就當犯法嫁啦」。

再來為了穩住4000點關口,國務院批准山東將1000億人仔職工養老保險結餘基金,交俾社保基金投資。呢類籌旗將會陸續有來,由於國家隊投入得愈來愈多,阿爺對A股更加不容有失,可見將來A股波幅會相當窄,或者人仔匯率波動更大也說不定。再者唔係隻隻股都係它千股,實務股的業務表現要跟上股價才不叫泡沫,中國內需非常差,暫時見不到瘋牛再臨的支持度。

另一方面用股市帶動資產增值再流入實體經濟的大計亦暫告一段落,帶動增長(今年的GDP保七)就要偏重消費稅項減免(如汽車)和對外投資收入,中國人或中國公司買起邊個地方已非新聞,將來只會更加厲害。也不要忘記好到天上有地下無的「一帶一路」。香港作為真真正正的金融中心,結算交易投資增值,樣樣都要手續費,加上資金出出入入,你識跟,錢就從這裡來。

補充少少;中國銀監會最近公布第三批地方資產管理公司(AMC)名單,山東、湖北、寧夏、吉林和廣西會有銀行開展金融不良資產批量轉讓及處置業務。也就是說國家將地方的不良資產和壞帳集中管理,地方財政帳面上就有改善,GDP同地方債問題就唔係問題。目前呢類機構已有15家,記住阿爺是球證,規矩佢訂,不宜睇太淡。佢地嘅缺點係認為「自由是一種病」,而我地就係最自由嘅地區。