8種口味收買你!KuKuRuZa爆谷限時Pop-up店!

8種口味收買你!KuKuRuZa爆谷限時Pop-up店!

相關信用卡:

8種口味收買你!KuKuRuZa爆谷限時Pop-up店!

發表日期: 2016 年 12 月 15 日 更新日期: 2016 年 12 月 15 日 飲食

作者:emily man

平時入戲院睇戲,好大原因都係因為可以拎住桶爆谷邊睇邊食,但如果可以買番屋企慢慢嘆、有多種口味你揀、仲唔洗怕食唔晒要搵人share,你話幾好?唔係無可能!因為紅爆日本嘅KuKuRuZa Popcorn黎咗香港開Pop-up store啦!

來自美國西雅圖,但就風靡日本同台灣嘅KuKuRuZa,特別在於除咗經典焦糖同芝士口味之外,仲有多種口味選擇。全部材料由日本直送,並採用零油熱烘方式製作,雖然香噴噴但完全唔油膩,仲更加健康,對於減肥中嘅女仔嚟講毫無抵抗力!另外,爆谷細心地採用zipper bag設計,每次唔洗因為怕腍而夾硬食晒,封口放入雪櫃,仲可以保存兩個禮拜,得閒拎出嚟慢慢食!

總共8款口味可以揀~

★夏威夷海鹽焦糖

完全明白點解呢隻味會係人氣no.1,因為真係好好味!一入口會先食到濃郁焦糖味,然後等混入其中嘅夏威夷粉紅海鹽融化後,再出現微鹹嘅海鹽鹹香,層次感非常分明,十足香水嘅前後調一樣,感覺好得意;唔會太甜又唔會太鹹,balance得非常好,在小編心中一樣是no.1!

★松露牛肝菌

人氣no.2!個人本身唔鍾意食黑松露,但對於鍾意嘅人黎講呢隻味可以帶你上天堂!黑松露味超級濃郁,偏鹹,唔知仲以為自己食緊fine dine...超級奢華嘅口味,可能真係得KuKuRuZa先有~

★黑白朱古力

呢隻限定版嘅黑白朱古力雖然混合咗黑/白朱古力,但個人覺得白朱古力味重啲,因為相對較甜,難啲食到黑朱古力嘅甘苦味,但一樣ichiban!鍾意食朱古力或者其實90%嘅女仔都一定buy。

★經典焦糖

雖然呢隻味好common,但同時亦係好難中伏嘅味,比起其他牌子嘅爆谷,KUKURUZA做得相當出色,焦糖味香濃但又唔會漏,加上crispy嘅口感,太正了~

★白朱古力抹茶

抹茶好多香港人都鍾意,甜度適中,因為加入左白朱古力所以無乜苦味,味道相對清新。

★車打芝士

芝士味超濃郁der~~~芝士控絕對抗拒唔到!

★酸奶油洋蔥

呢隻味超邪惡!同洋蔥薯片一樣有魔力令你食唔停口,食完一粒又一粒...大愛!

★雲尼拿黑桑子

呢隻味賣相最靚,但個人覺得就最唔好味,味道有啲詭異而且太甜,應該係咁多隻味入邊小編唯一唔鍾意嘅~

雖然爆谷無得單買一隻味,一定要3包5包咁以禮袋形式購買,但隻隻咁都好好味又特別,揀3隻味都嫌唔夠呀!其中聖誕限量罐裝唔止個盒靚,更有齊8款口味,自己食固然爽,送人一樣有心思又有face屎!

3款口味$115、5款口味$199,8款口味$465

KuKuRuZa Popcorn Pop-up Store

日期:即日起至2017年2月5日
地址:灣仔皇后大道東202號QRE Plaza地下
電話:2743 8617