7萬月租淺水灣 麥包搵少啲都唔得

7萬月租淺水灣 麥包搵少啲都唔得

相關信用卡:

7萬月租淺水灣 麥包搵少啲都唔得

發表日期: 2016 年 12 月 26 日 更新日期: 2016 年 12 月 26 日 生活

作者:甦師父

喺TVB做咗29年嘅麥長青(麥包),結束同無綫嘅賓主關係,改簽部頭約。佢話自己年紀大紅唔起,聽落都幾唏噓吓。唔知大家知唔知,舊年麥包已經默認入住月租$70,000嘅淺水灣豪宅單位,被指充大頭鬼。事實上麥包早年做嘅物業投資都損手離場,仲試過炒iPhone炒燶晒,仲試過人追債追到踩上TVB添,真係好令人狐疑,以佢嘅財政狀況真係住到淺水灣?

▼麥包早已入屋,但對於多次投資失利,筆者深表遺憾

早喺舊年,麥包就被傳媒揭露家住淺水灣風水豪宅,月租成$70,000,真係一兩個月搵少啲都唔得。乜原來麥包做藝員咁好搵嘅咩?佢回應話「交租冇問題」,仲話自己一直儲唔到首期,但又想一家人住好啲先會咁。咁筆者想問,其實用$70,000中$20,000交租都已經可以住得唔錯,再每月儲多$50,000買樓,唔係好快儲到首期咩?算啦,佢咁講,唯有信佢啦。

麥包又話,做兒童節目果陣,搵萬幾蚊都係租二萬幾蚊嘅樓仲供埋車,要出去打多幾份工應付咁話。

7萬蚊可以租乜樓?

麥包今日係咪仲住緊淺水灣,住邊幢樓邊個單位,筆者唔知啦,但$70,000可以租到淺水灣乜樓?筆者喺中原同美聯網搵咗3個差唔多價錢嘅單位,研究吓麥包可以點住法。

首先搵到嘅係蔚峰園中層B室單位,賣就叫價$3,500萬,租就$60,000,3房問隔,實用面積有1,113方呎,實呎價$31,447,實呎租要成$54一呎;出入主要靠淺水灣道同黃泥涌道;1988年入伙,樓齡28。

跟住係雅景閣H室單位,叫租$75,000,但得果一房間隔。呢個單位實用面積1,234方呎,實租$61一呎,但係1993年入伙,樓齡較淺;由於位置係南灣道近海灘位置,落去游水非常方便。

再之後搵到嘅係淺水灣道37號3座單位,實用面積1,254方呎,3房1套,叫租$65,000,實租$52一呎,樓齡22年,都係經黃泥涌道同淺水灣道出入,位置夠高,可以居高臨下望住淺水灣。

▼蔚峰園

▼近住海灘嘅雅景閣

淺水灣道37號居高臨下

投資上屢敗屢戰

好喇,講完3個豪宅租盤,睇嚟都係太離地,各位只能夠望門輕嘆,大家都係想知麥包點租得起淺水灣單位。

筆者都好想知,但筆者知道嘅係,佢好似做乜物業投資都蝕。

好似喺2006年,有傳媒發現麥包做咗鋪王,買商鋪投資吸金,一度畀個商鋪炒家睇中,麥包仲帶啲藝人去旺角東京銀座撐場,不過最尾商場倒閉收尾。

仲有呢?同年,麥包打算喺鰂魚涌引入旺角金魚街槪念,打造水族廣場。呢個一聽就知唔work嘅idea,結果佢同partner傾唔埋而離場。

經過呢幾年損手,麥包並無減低戰意,舊年佢用800萬買入荃灣工業大廈天台全層,成18,000方呎大架 佢話入手原因,一嚟等大財團收購,二嚟可以租畀青年團體,可以搞function、藍球場、war game場咁。但我要提吓佢,工業大廈地契公契未必畀人搞康樂嘢。

冇咁大個頭唔好戴咁大頂帽 凡事量力而為

▼今年初有傳麥包炒燶iPhone

咁最近麥包又點呢?睇嚟真係唔太好,除咗因為佢同無綫改簽部頭約,同無綫關係唔再穩定外,仲傳佢前年炒燶iPhone,欠下財務公司$700幾萬,再向人借錢同預支show錢,咁睇嚟佢並唔係想像中咁掂。佢冇否認蝕到入肉,只係否認有借「財仔」。

真係冇借「財仔」咩?有報道又話,今年初有2名大漢殺入TVB辦公室要搵麥包追債喎,仲踩場去埋佢代言嘅「安記海味」添,搞到安記要終止佢代言嘅合約。所以呢個故事教訓我哋,做人嘅嘢,冇咁大個頭,就唔好戴咁大頂帽,一嚟投資始終涉及風險,二嚟衣食住行果度啲開支預鬆返少少,起碼畀到息,唔使畀人上門追數啦!