7折里數兌換來回機票

平時講得多賺多啲里數，例如今個月用美國運通國泰航空信用卡去指定商戶簽滿$100或以上，每$1就可以額外賺Asia Miles 1里數 (詳情)，有呢張卡嘅朋友應該儲咗好多Extra Miles。但係儲完梗係要用啦，今次就講下點樣用得抵啲。Asia Miles而家同國泰做緊里數兌換來回機票7折優惠，可以換嘅目的地包括台北、高雄、曼谷。

先講台灣線，由而家起至9月14號可以訂 (詳情)，出發日期係9月，不過中秋期間 (9月5號至9號) 就唔適用。原本香港來回台北或高雄要15,000里數，而家只要10,500，慳咗4,500。航班選擇方面，香港去台北有4班機，台北返香港就有7班；香港來回高雄就各有2班。去台北有早機或下晝，回程都係差不多，最晏係15：25；去高雄有中午或晚機，回程就早機或中午。搵個Weekend去玩下食下都OK。

至於去曼谷，由而家起至9月30號可以訂 (詳情)，9月1號至10月31號出發，中秋期間出發都OK。座位就指定係頭等或商務艙，原本需要55,000或40,000里數，而家就38,500同28,000。平時坐經濟艙要20,000，升級去商務艙要20,000，就算升去特選經濟艙都要10,000，可以當係用8,000升級。當然，8,000里數都唔係少數目，差不多等於上面台灣來回機票，豪呢一次還是留返下一次，大家自己考慮喇。航班方面，就有彈性好多，早、午、晚都有。另外提一提，以上兩個優惠，機場稅同附加費要另外俾。