3月淡季 去邊旅行夠晒抵？

農曆新年過咗，復活節又未到，踏入3月呢個旅遊淡季，各大旅行社為咗吸客，開團鬥平就無可避免。如果各位請到假，而又仲未出機票去旅行，仲有乜團最抵去呢？我哋就精選咗杜拜、關島同土耳其3個長線抵玩團，最平埋單都只係$4,000！

 

 

$4,374廉遊杜拜

 

石油富國杜拜係中東最受旅客歡迎的國家，無論係棕櫊島定世界最高建築哈里發塔都令人嘆為觀止。雖然杜拜近年大力發展旅遊業，又成為國際航運中轉站，但生活成本高同酒店房間價格唔平，剩係講團費都要$5,000起跳。

美麗華的杜拜、阿布達比5天團，3月28日出發的團費每人只需要$4,899，計埋$675稅，再扣減信用卡網上付款的$700同2人同行的$200優惠，埋單只係$4,674；如果會員用恒生卡付款，仲可以減多$300，即係只需要$4,374就可以去杜拜喇！

 

▼3月28日的團費全月最平

 

▼非會員喺網上用信用卡報團，2人同行埋單$9,348，平均每人$4,674，如果會員用恒生卡付款，每人再平多$300

 

航空公司：阿聯酋或國泰（直航）

 

景點：哈里發塔

位置：杜拜

樓高169層的哈利發塔高828米，係全球最高的建築。搭世界最快的電梯上去124樓觀景層，一覽杜拜呢個人造的沙漠綠洲。

 

景點：黃金街

位置：杜拜

阿拉伯人唔單止愛「黑金」，仲好鍾意黃金。黃金街金舖成百上千間，而且價格比世界各地唔少地方平。杜拜政府嚴禁賣假金，如發現金舖違規，會即時拉人兼封舖，所以喺度買金係非常信得過。

 

 

土耳其8天團 $5,554

 

橫跨歐亞的土耳其，係歷史文化古國，特洛伊古城有木馬屠城記，以弗所古城有羅馬時期的遺蹟；最大城巿伊斯坦堡就由新舊、東西文化交替而成， 土耳其的魅力保證你不枉此行。

永安的土耳其8天團，就會去晒伊斯坦堡、奇石林、棉花堡、以弗所古城、特洛伊古城呢幾個必去景點，啱晒鍾意歷史文化同異國風情的旅客，而且3月16日的團費只係$4,999，計埋稅項都係$5,754，用埋中銀卡仲可以減$200添，即係$5,554玩足8日，超級抵玩！

3月其他日子，如19日、23日同26日，未計稅項的團費就升到$5,500以上。

 

▼用中銀卡埋單每人$5,554，但如果一人報團，可能要加$2,500單人房的附加費

 

航空公司：卡塔爾航空（香港出發經卡塔爾多哈轉機）

 

景點：聖蘇菲亞大教堂

位置：伊斯坦堡

建築風格堪稱拜占庭式建築的典範。經歷過東正教、羅馬天主教同伊斯蘭教影響，可以話係世上文化內涵最廣的宗教建築。大教堂依家變成博物館，每年接待250萬名旅客。

 

景點：奇石林

位置：卡帕多細亞

奇山怪石的自然景觀似足月球表面，吸引世界旅客，主要觀賞方式包括乘坐熱氣球。唔少山洞都變成酒店，非常有特色。

 

景點：特洛伊古城

位置：小亞細亞西北部

古代木馬屠城記發生的地點，現存古城遺蹟，並有一仿製希臘人混入城用的木馬。

 

 

$4,159輕鬆遊關島

 

去旅行，有啲人鍾意陽光與海灘，但來來去去都係東南亞的星馬泰，大家可能嫌悶。

依家康泰有個關島4天團，逢星期三出發，3月團團費都係$4,000唔使，3月15日更低至$3,599，計埋稅項的$560等雜費都係$4,159。至於3月其他的17日、22日同29日，價錢都只係貴$100。

不過要注意的是，除咗早餐之外，呢個團的午餐同晚餐都係自費，而且自由活動時間較多，如果想玩浮潛、出海睇海豚咁，就要另外畀錢喇。

 

▼$4,159，就可以去關島同陽光玩遊戲喇

 

航空公司：聯合航空（直航）

 

景點：情人崖

相傳古時一個叫Chamorro的少女同同族中少年相愛，但爸爸係要棒打鴛鴦，要佢嫁畀西班牙軍官，少女唔肯，就喺呢個崖跳崖自殺。情人崖風景壯麗，遠眺太平洋一流。

 

景點：自由女神像

自由女神像唔單位美國紐約同法國巴黎先有，美國童軍喺1950年，即係紐約自由女神像落成40周年，喺關島打造一個迷你版。