2017春夏成田機場最Hit手信

2017春夏成田機場最Hit手信

相關信用卡:

2017春夏成田機場最Hit手信

發表日期: 2017 年 05 月 18 日 更新日期: 2017 年 05 月 18 日 旅遊

作者:Salad Ho 沙律

去日本旅行買食物手信一定夠大方得體,不過去機場交通途中好易整爛手信,而且唔少食物手信廠為保新鮮,都唔點加防腐,所以食用日期得幾日都唔奇,為咗避免以上麻煩,去到機場先買手信係最方便!加上有Tax Free鋪頭,慳埋慳埋仲可以買多盒手信。今次喺成田機場入闡後去咗Fa-So-La TAX FREE AKIHABARA買手信,仍然咁人山人海。今季春夏牛奶、抹茶甜品繼續高踞東京人氣手信榜位置!

1.Pocky百力支地區限定三口味:甘王草莓、佐藤錦櫻桃、五郎島金時 15包 800yen

最經典的日本零食一定係glico嘅「Pocky百力支」。由1966年於日本大阪發售,喺日本地區發行超過200種口味,一年賣出超過50億盒!呢3盒限定Pocky每支長18CM,比一般Pocky長5CM,重量係正常版嘅4倍。

九州地區限定:甘王草莓

用福岡南部八女地區出產嘅「甘王草莓」,甘王草莓果肉鮮紅、外型圓潤大粒。Pocky入口後酸酸甜甜,好似食緊甘王草莓一樣!好幸福!

北陸地區限定:五郎島金時甘薯

用石川縣所生產嘅「五郎島金時」甘薯。五郎島金時甘薯濃郁香甜,而且好少見會混入百力支裡面,呢個聯乘都幾過癮!大家可以一試。

東北地區限定:佐藤錦櫻桃

「佐藤錦櫻桃」別號「果樹園寶石」,係日本東北名物,皮薄、肉質幼滑、香甜多汁,果肉酸甜度對比強烈,令人十分開胃,平均都要HKD$10一粒呢,非常名貴,所以賣場中,以「佐藤錦櫻桃」Pocky最搶手!

2. 札幌農學校牛奶餅乾 48件 2000yen

「札幌農學校」有150年歷史,後來改名做北海道大學。呢款手信曾連續 3 年獲「世界食品品質評鑒大會」頒發最高金獎,餅乾用北海道奶油、北海道小麥同北海道土產牛奶新鮮製造,全部材料都出自北海道。食落牛奶味超濃郁,香、醇、濃,老少咸宜,鍾意日式餅乾嘅朋友一定要買!

3.「茶之環」抹茶手信

「茶之環」來自廣島,創業超過50年,喺日本無人不識。「茶之環」最初只賣茶葉,後來為咗推廣抹茶而開咗抹茶甜品專門店。日本著名頂級茶匠森田治秀為店家鑑定適合嘅抹茶,再而炮製成抹茶產品,出品均係日本公認高檔糕點。

特濃抹茶蛋卷 953yen 10件

撕開包裝之後,抹茶香緩緩飄出。蛋卷抹茶味道超濃,質地非常鬆脆,蛋卷中間抹上咗一層薄抹茶朱古力,有驚喜!


抹茶+玉露費南雪蛋糕 1000yen 8件

費南雪蛋糕係經典法式常溫蛋糕,外形似金磚。「茶之環」將日式味道同法式蛋糕融合,炮製出呢個主打熱賣甜品。咬落去茶香濃厚,質地濕潤,類似海綿蛋糕,加返杯茶當係下午茶就最Perfect。怕甜嘅朋友可以食玉露味,比抹茶多少少苦澀味,好特別。

4.日本橋屋長兵衛牛油蜂蜜烤蛋糕

用上日本蛋黃,蛋黃味道厚重,而且仲好香牛油同蜂蜜味。咬落去口感酥脆,雖然表面加咗糖粒,但因為摻咗少少鹽,所以可以中和甜味,適合配上黑咖啡食用。

5.Tokyo Milk Cheese Factory海鹽芝士曲奇 1400yen

Tokyo Milk Cheese Factory於日本共有8家分店,創下賣出2,800萬片起司夾心餅乾嘅紀錄。 Tokyo Milk Cheese Factory人氣No.1產品,餅底香脆鬆化,加上北海道牛奶同法國蓋朗德頂級海鹽,內餡以法國聞名的嘅金文拔芝士做夾層,每口都充滿濃郁奶香。香港雖然都開咗專門店,不過20片海鹽芝士曲奇售$168, 比Fa-So-La TAX FREE AKIHABARA貴。

Fa-So-La TAX FREE AKIHABARA
地址:東京成田機場第1候機樓南翼樓3樓 narita nakamise
時間:7:30~20:30
地圖: