2017年春季關西機場最Hit手信

日本真係太邪惡！連機場都咁多嘢買，務求令你離開日本前都要使晒身上一分一毫。我就習慣去到機場先買手信，一來可以確保新鮮，有好多美食有效期得幾日；二來機場免稅嘛！慳埋慳埋可以買多盒Royce朱古力㗎喇。而家帶大家睇下關西機場有咩最Hit手信啦！

Check Ponit 1：空港専門大店

集合關西人氣手信，除咗食物仲有卡通人物小物，適合最後衝刺！

地址：Terminal 1，3／F
電話：072-456-6573
時間：7am-9:30pm

1.井筒八ツ橋本舗京都ぶらぶら 540yen

喺早期日本農村好窮困，蕨菜成為農民嘅佳餚。佢哋將蕨菜嘅根挖出，之後曬乾再磨成蕨粉，然後加水加糖製成蕨餅，做法繁複，後來於日本古代只有皇家貴族先可以食到呢。

井筒八ツ橋本舗於1805年起家，係京都日式甜點老牌名店。佢地嘅京都蕨餅係手信名物，非常鬆軟，入口即溶，口感軟糯綿滑，日本人叫做Mochi Mochi，即係煙煙韌韌咁解。抹茶蕨餅本身已經帶有抹茶味，加上微苦嘅抹茶粉，喺屋企都能夠回味京都風味呢。

賞味期限由製造日開始計只有10日，買完最好快快食咗佢喇。

另有加入柚子肉同柚子味嘅柚子蕨餅同傳統肉桂黃豆粉味，加埋黑糖蜜真係冇得輸。

2.おたべ八ツ橋 648yen

八ツ橋係京都最具代表性嘅點心，源於1689年，已有三百幾年歷史。生八ツ橋未經烘烤，口感好似麻糬。包餡嘅生八ツ橋外型為三角形，唔包餡就係扁平長方形。

一盒裡面有抹茶味同肉桂黃豆粉味八ツ橋。

おたべ以賣八ツ橋起家，所以要買八ツ橋做手信，揀おたべ出品一定有保證。おたべ嚴選「越光米，北海道的紅豆，福井縣若狭名水」等上乘材料製造八ツ橋。包裝用咗おたべちゃん依個低頭鞠躬嘅京都舞妓圖案，好易辨識。

3.神戶 cream cheese cake 1,458yen

店中人氣No．1! 於2010及2011年連續2年被Monde Selection選為國際金獎，實力不同凡響。佢用咗法國同澳洲嘅cream cheese，所以芝士味又濃又香。咬落質感似New York Chesecake，比較扎實，但味道就比較甜，似食緊乳酪一樣，如果雪凍會再好食啲，好似食緊雪糕一樣。

約4吋，供2-3人食用。

包裝精美，淨係個盒都咁有心思，值回票價。

4.多口製菓まること莓關西限定白雪いちごちゃん 864yen

多口製菓來自奈良，除咗某啲外觀部分一定要用機械，其他工序都堅持人手一個一個製造，非常有誠意。白雪いちごちゃん係用香甜嘅白朱古力包裹住優質完熟原粒士多啤梨乾，士多啤梨嘅酸甜剛好中和白朱古力嘅甜膩，口感酥脆。切開仲可以完整見到兩者嘅層次，滿足感官享受。

關西地區限定手信，其他日本地區都買唔到呢。

見到包裝上咁大粒士多啤梨已經流口水！

Check Ponit 2：Applause

呢度嘅手信比較高級，多名店產品。

地址：Terminal 1 3F
時間：07:00－21:30

1.辻利兵衛本店京之竹抹茶年輪蛋糕 1,620yen

位於京都宇治嘅百年老店辻利兵衛本店，創業於1860年，已經有150多年歷史。以宇治抹茶、甜品點心聞名。店內的和菓子都是日本人最愛的宇治抹茶，產品都使用高級宇治抹茶，而辻利兵衛本店可以將高級宇治抹茶嘅苦澀味同和菓子嘅香甜完美結合，令辻利兵衛本店嘅甜品無論於國內外都十分受歡迎。

聽講創作意念來自茶園嘅青竹，造型特別之餘原來都有喻意㗎！青竹代表長壽，咁有意思唔怪得成為辻利兵衛本店人氣No．1甜點。

好似竹筒一樣嘅包裝都好有心思。

2.大阪Banana蛋糕 6件648yen／10件1,080yen／15件1,620yen

著名嘅東京Banana蛋糕係人都識，原來大阪都推出大阪Banana蛋糕！外型雖然冇東京Banana咁精緻，不過大阪選擇以味道取勝！我覺得大阪Banana嘅香蕉味比較自然。

夾心係濃濃嘅香蕉餡，好香甜，蛋糕就係蜂蜜蛋糕，好多網友建議雪凍之後會仲好味！

下午茶以一條大阪Banana配茶或咖啡就Perfect。

冬日限定大阪Banana Caramel Mocha蛋糕 6件864yen

冬季推出咗Caramel Mocha口味，蛋糕加入濃縮咖啡同焦糖味道，同內餡嘅香蕉泥好夾！

3.食倒太郎蜜桃批 864yen

大阪限定手信！大阪道頓堀名物「食倒太郎」推出蜜桃批啊，香脆嘅批皮包住甜甜嘅蜜桃果肉，口感一脆一軟好特別！另外，唔只外盒設計可愛，裡面嘅個別包裝仲印上食倒太郎五種表情，買嚟做手信送畀朋友一定可以討到朋友歡心。

每條蜜桃批約比手指長少少。

包裝好靚，我好小心咁拆開，儲埋咗張包裝呢。

4.Mon Cher 堂島卷

來自日本頂級甜品品牌Mon cher，喺日本已有25間分店，招牌「堂島卷」係當地最受歡迎嘅蛋糕卷之一，雖然只係由蛋糕同忌廉造成嘅簡單組合，但製作一絲不苟，甜品師傅每日用在地新鮮材料親手製造，令每件蛋糕鬆軟新鮮，至今已售出超過1,500萬條。店方堅持絕不添加防腐劑，每件蛋糕亦唔會放存太耐，每天只製作一定數量後就第一時間運到店中。

Dojima Blanc Roll 1,600yen