2014港股十大之最

2014好多事，股票市場都相當精彩，好事膠事荒謬事，筆者揀咗當中十件之最一齊回顧下：

最反高潮
今年港股最大件事當然係11月17日幽靈號列車「滬港通」開出。事前個個吹到「此曲只應天上有，人間能得幾回聞」又話大禮又話派錢又千載難逢咁，用滬港通滿月12月18號計，恒指跌六巴仙，港股市值蒸發萬二億，來港資金88億人仔。嗱嗱嗱，後生仔睇嘢要睇兩面，一個月內滬指升兩成三，上海市值升四萬一千億人仔，流入A股資金678億人仔，做大禮呀明唔明？果日睇到689「覲見」總理強仔果陣話「滬港通」係香港「好受歡迎」，果刻起我開始相信愛恩斯坦嘅相對論，宇宙裡面有另一個「689香港」。

最夠鑊氣
幽靈號列車直接影響無咩，最叻豬係炒起劵商板塊。當中上海股市老大哥申銀萬國(218)低位2.13同高位9.35差超過4倍，另一劵商英皇證劵(717)低位0.358同高位1.32都係咁上下，預期出年繼續炒！

最嚇鬼
當年股神八蚊買咗一成比亞迪(1211)，最高炒到上88.4，算係近年相當傳奇嘅股。呢隻風頭躉喺12月18號一日跌五成，最低18.7，成日流言滿天飛，嚇親唔少巴絲，好彩粉絲力捧，三個交易日後已經上返29蚊水平，都無咁驚。

最肉緊
股價由年中低位2.12到11月高位4.77，已經反映香港電視(1137)嘅故事。港視團隊完全體現出香港人「魯芬急轉彎」嘅能力同唔認輸拼勁，由數碼電視廣播變到網購平台，好多香港人都好肉緊，裝定App買埋機頂盒等佢地開台，仲聽幾位Marketing中人話落唔到廣告但好開心。香港人，有時百厭啲花款多啲唔係仲可愛咩？

最荒謬
新濠博亞娛樂(6883)用1562萬美金同大股東買咗項「不可分割的資產及權利」嘅5成股權，即係咩？當中有「宣傳公司於亞洲之物業及Crown於澳洲之物業而製作的短片」，你無睇錯係「短片」。可能人哋搵咗李安執導、王家衛編劇、馬田史高西斯監製、華仔偉仔金城武章子怡張震…主演、Edison出半秒仲有成龍大哥殺極唔死拚命翻牆入監打到祖名彈飛5米，唔好笑呀，大股東表演緊由外到內再到返外嘅財技。

最抽得
大連萬達商業地產(3699)榮登IPO集資王，抽水288億元，以定價48蚊計大股東王健林股權市值1,166億，我成世人擁有大過1,166億呢個數目嘅，睇怕只有身體細胞，一個人大概有40至60萬億細胞，王健林我仲贏你唔到！

最瘦身
前股王騰訊控股(700)三月頭宣佈拆細，一拆五，入場費由五萬幾減到萬一蚊到，減咗八成放棄股王地位換多啲散客，可以講正式告別高增長時期，有潛積做收息股。

最過癮
光啟科學(439)，唔好以為係搞探索黑洞奧秘果種你成世唔會明嘅研究。佢地主力發展臨近空間科技，臨近空間即係高過飛機，矮過衛星嘅高度，仲話可以放個ROUTER係上面做超級WI-FI，佢哋喺深圳龍崗個基地叫「阿波羅」，型唔型先？今年仲有兩項新搞作，第一係發展噴射背包，人稱空中電單車，可以有軍事同商業用途，暫時唔好講咁偉大住，起碼吸引到一眾土豪同大細路。另外買咗間Ｓｏｌａｒ　Ｓｈｉｐ公司，話係中國同香港搞混能飛機，少少油加太陽能就飛到，成件事真係好過癮。

最鋒味
放心，唔關鋒菲戀事，想講謝霆鋒入主漢傳媒(491)啫。霆鋒注入「PO朝霆」六成股權變成漢傳媒單一最大股東，消息公布當日個價由0.38最高升到0.87，足足一倍有多。不過漢傳媒一直蝕，呀大股東之前聲稱「PO朝霆」市值60億，年賺一億，今年頭九個月成績比舊年好，但仲蝕緊，咁究竟好唔好景？記住潛龍勿用，這樣玄妙你懂不懂~

最過山車
新傳媒(708)呢程過山車由11月17號開始，有消息傳出大水喉恆大收購，當日由0.475升三點二倍到1.52，果星期最高上到5.8，升12.2倍！ 11月24號跌兩成跟手25號停牌，去到平安夜復牌，公布恆大作價每股1.67全購，價咁低搞到半日市都跌四成四，個個以為收工玩完點知今日(29號)又炒高五成六，收市報3.92，呢程過山車仲未坐完。最搞笑係做開媒體嘅新傳媒會用八成半資金投資整容、美容及保健相關業務，好詭異。