2014下半年旗艦手機降臨 (二)-Sony Xperia Z3

2014下半年旗艦手機降臨 (二)-Sony Xperia Z3

相關信用卡:

2014下半年旗艦手機降臨 (二)-Sony Xperia Z3

發表日期: 2014 年 09 月 05 日 更新日期: 2014 年 09 月 05 日 購物

作者:炸雞波

9月手機界真係好熱鬧,最矚目 (對於用家同炒家嚟講)當然係9月9號iPhone 6發佈,而其他大廠都相繼推出新款旗艦機,琴日講咗Samsung Galaxy Note 4,今日就講下Sony Xperia Z3。


驟眼睇落去,Z3同Z2係外型上分別不大,就咁睇正面同背面其實幾難分得出邊部打邊部,不過Z3嘅側邊比較圓,會好揸手啲,同時亦更薄,只有7.3mm厚,薄咗0.9mm。不過Z3除咗黑色同白色,竟然冇咗Z2非常熱門嘅紫色,取而代之係啡銅色同淺綠色,而白色Z3嘅正面變成白色,唔再係黑色 (其餘都係黑色)。規格方面,Z3只係小升級,CPU快咗,RAM同儲存空間都係3GB同16GB,效能有少許提升。

邊位變得圓潤,顏色亦統一咗,唔係Z2咁兩截色

相機規格亦冇大變動,仍然係2,070萬像素,鏡頭廣角由27mm升到25mm,影相角度更Wide,ISO亦可以去到12,800,感光度之高係目前手機之最。新加入嘅Face In功能,可以前後鏡頭一齊影相,然後夾落同一張相度,呢個功能喺其他牌子嘅機都有。

Z2聽歌效果喺手機中算係好出色,Z3亦一樣,本身有立體聲喇叭,內置DSEE HX音效技術可以提高MP3同AAC嘅還原度,仲有消嘈技術,配合Sony自家耳機,聽歌可以過濾雜音,音質會更加清晰。

至於主要賣點,Z3標榜符合IP65/IP68防水防塵標準,可以在1.5米深的水下30分鐘正常操作30分鐘,倒瀉清水咖啡都唔會有問題,不過我諗應該冇乜人會好似官方宣傳咁話,拎住部機去水底影相卦?

我諗唔會有正常真係咁做...

Z3有一個專為PS4 機迷而設嘅PS Remote PLAY功能,例如屋企人要睇電視,只要將Z3連接到屋企嘅Home Network,就可以將Z3當係Mon,用PS4手掣繼續打機。


用返PS4 嘅DUALSHOCK4手掣就得,個Mount要另外買。

同時仲有2款新嘅智能手錶,分別係SmartBand Talk同SmartWatch 3。SmartBand Talk採用弧面設計,內置收音咪同喇叭,可以講電話,同埋語音控制手機部分操作,仲有內置感應器亦可以作為收集運動數據。屏幕採用e-paper顯示,慳電好多,係陽光底下亦可以睇得清楚。


SmartBand Talk用e-paper畫面應該可以用耐啲,唔使成日充電。

至於SmartWatch 3就係用Android Wear平台,同Android手機嘅整合性更強,可以自動提供各種有用即時資訊,同埋支援類似Google Now嘅語音查詢。佢內置4GB儲存空間,1.6吋LCD屏幕,可以儲存少量資料,例如音樂Playlist,亦有內置感應器可以收集運動數據。


SmartWatch 3隻檸檬黃又幾Sharp喎。

Sony冇確實講Z3發售日期,只係話今年秋天,即係11月前會有?如果趕得切10月內出,就可以用中銀信用去百老匯買,一單簽$3,000以上,就會有5%回贈,最高回$300,即係要簽$6,000,估計Z3賣價都會接近呢個數。不過如果到時買Z3都有「買機即減」優惠,咁食唔盡回贈都冇乜所謂啦。