2014下半年旗艦手機降臨 (三)-Apple iPhone 6

2014下半年旗艦手機降臨 (三)-Apple iPhone 6

相關信用卡:

2014下半年旗艦手機降臨 (三)-Apple iPhone 6

發表日期: 2014 年 09 月 10 日 更新日期: 2014 年 09 月 10 日 購物

作者:炸雞波

真係萬眾期待,iPhone 6終於發佈,Apple終於都出大尺寸屏幕版,除咗4.7吋既iPhone 6,仲有5.5吋嘅iPhone 6 Plus。兩部機顏色同5s一樣係,有灰、銀、金3種顔色,機身設計比iPhone 5s圓渾,屏幕四邊係弧面,伸延到側邊,而側邊亦都唔係以前嘅直邊,亦係弧面。機身厚度比iPhone 5s薄,iPhone 6係6.9mm,6 Plus就係7.1mm。



背面唔再係兩截色,但有兩條邊。

雖然今次容量都係三級制,仍然有16GB同64GB,但就冇咗32GB,加入128GB。新型A8晶片嘅CPU同GPU效能分別提升50%同80%,但就比5s嘅A7慳電50%,真係咁勁?

配合薄機身,側邊嘅音量掣亦改成長條形。

機背鏡頭有少少凸出嚟,會唔會好易整花?即係焗戴保護套?

屏幕方面,iPhone 6同6 Plus用咗Retina HD屏幕,解像度分別提升到1,334 × 750 (326PPI) 同1,920 × 1,080 (401PPI),以PPI (Pixels per Inch) 計,iPhone 6同5s一樣,6 Plus就更高,畫質自然更加清晰細緻。而且6 Plus仲有橫向顯示模式,郵件、日曆、股票介面重新設計,分開兩邊,例如郵件一邊係訊息清單,一邊就係電郵內容,善用大屏幕。

橫向顯示可以善用大屏幕。

有人擔心大Mon好難單手操控,新iPhone就有「觸達性」功能,撳兩下Home掣,畫面就會縮落嚟,方便用手指公操控,喺Safari或郵件掃左右就控制上、下一頁。

「觸達性」功能令成個畫面縮落下半邊。

而家可以同時支援香港同大陸中國移動4G嘅手機款式並唔多,新iPhone就得喇,以後返大陸可以直接用新iPhone連4G網絡,唔使用另一部機。另外亦支援Voice over LTE  (VoLTE) ,加快駁通通話,視像電話畫質亦更流暢。

雖然新iPhone鏡頭解像度仍然係800萬像素,不過有Focus Pixels功能,可以加快自動對焦,f/2.2光圈配合防震功能 (iPhone 6 Plus 有OIS光學影像防震),夜攝效果更好。前置FaceTime HD鏡頭亦有f/2.2光圈,可以感應多81%光源,啱晒自拍友。而拍片最高解像度係1,080p,亦可以拍720p 120 fps 或 240 fps慢動作影片。

新iPhone加入NFC支援,同時推出Apple Pay,可以將AE、Visa、MasterCard信用卡資料加密儲存喺iPhone,喺接受Apple Pay嘅商戶要碌卡時只要將部iPhone放埋去感應卡機度,用Touch ID指紋辨識確認身份,一嘟就可以過數俾錢,甚至連網購都可以用,唔使次次都要打信用卡號碼同地址。萬一部機唔見咗或者被偷,都可以透過「Find My iPhone」Delete返入面嘅信用卡資料。10月Apple Pay會喺美國先推出,香港就未用得住。當然,既然有NFC,相信遲啲香港信用卡嘅MasterCard PayPass同Visa payWave,同埋八達通都會對應新iPhone。

Apple Pay喺香港未用得住。

記得5s時中國係第一輪發售地區之一,今次冇份,唔知係咪Apple為咗之前大陸電訊商同網民不斷爆iPhone 6料而做嘅「回應」。好彩香港仍然係iPhone 6首賣地區之一,要買的話,可以喺9月12號15:00去Apple Store網上商店買,或者16號早上8:00上網預約,幾得預早少少開始「F5」,遲少少買晒就要等下一轉,頭三日預約唔到,之後要再預約就相當難,因為炒家已經寫好Program自動預約,人手好難同機器搶。

售價
iPhone 6 / 6 Plus
16GB:$5,588 / $6,388
64GB:$6,388 / $7,188
128GB:$7,188 / $8,088

One more thing… Apple Watch
今次發佈會嘅「One more thing...」係講Apple Watch,錶身用不銹鋼同鋁合金打造,亦有18K黃金同18K玫瑰金嘅款式,顏色有黑、灰、銀同金等,外形四四方方,我個人就覺得色就幾靚,但外形麻麻。錶身有38mm同42mm 2個尺寸,可以當係分男女裝,錶帶有幾款選擇,例如膠帶、皮帶、金屬帶。


唔同嘅錶身顏色。

各款錶帶。

Apple Watch除咗支援iPhone 6同6 Plus,亦支援5、5s同5c。同好多Smart watch一樣,Apple Watch主要功能都係作為手機嘅伸延,喺手上接收資訊,例如新收到既訊息、即時資訊,亦可以撥接電話。錶背亦有運動感應器,探測心跳脈搏,作為健身記錄。個Touch screen 可以感應到力度,輕輕一按就當確定,按大力當係其他Function。一般手錶個旋轉扭掣係用嚟校時間,Apple Watch粒掣係用嚟上下瀏覽資訊或者Zoom,撳落去就返Home screen,撳實就會開Siri。

Digital Touch功能,可以互傳簡單預設或手畫圖案,Send簡短錄音、點幾下屏幕Send個類似Poke嘅Message、甚至心跳去朋友嘅Apple Watch,隻錶就會震,無聊得嚟都幾過癮。

Apple Watch亦支援Apple Pay,將會拍埋感應讀卡器,撳兩下旋轉扭掣下面個掣就OK。

Apple分咗3個套裝,Watch、Watch Sport、Watch Edition,配唔同錶帶。預定售價定係$349美元起 (大約$2,700),2015年初開賣。