2014下半年旗艦手機降臨 (一) -Samsung Galaxy Note 4

2014下半年旗艦手機降臨 (一) -Samsung Galaxy Note 4

相關信用卡:

2014下半年旗艦手機降臨 (一) -Samsung Galaxy Note 4

發表日期: 2014 年 09 月 04 日 更新日期: 2014 年 09 月 04 日 購物

作者:炸雞波

嚟到2014下半年,各手機大廠又開始推出新款旗艦手機,趁住呢個星期喺德國柏林都會舉行IFA電子展發表,首先出場嘅係Samsung Galaxy Note 4。


Note 4將會喺10月開賣,佢採用2.7GHz四核心CPU配3GB RAM、32GB儲存空間,CPU比起Note 3快咗。不過連接介面就由上一代嘅USB 3.0改返做2.0,雖然支援快速充電,但如果駁電腦過資料或者Backup,就會慢啲。佢仍然係用5.7吋Super AMOLED屏幕,但解像度就升到2,560 x 1,440,畫面更加清晰,暫時去到呢個解像度嘅已推出手機就只有LG G3同Oppo Find 7,想要超高清Mon就多一個選擇。相機像素亦由Note 3嘅1,300萬提升到1,600萬,同埋支援OIS光學影像穩定技術,影相可以防手震,而前置鏡頭370萬像素鏡頭可以玩120度自拍,成班fd堆埋一齊影相都唔怕影唔晒。

有黑、白、金、粉紅4種顏色,機身邊框用金屬製造,但背蓋仍然係塑膠仿皮紋。

而Note 4最主要嘅S Pen功能亦有改良,除咗原有嘅Action Memo、Screen Write、 Image Clip等功能,新加嘅Smart Select可以選擇同Capture畫面上任何位置,然後貼喺唔同App分享或應用。另一項新功能Snap Note可以將黑板或紙上嘅Note影低,然後轉成S Note,的確方便。

Swarovski水晶背蓋,啱晒女士。

同場仲有仲有一部手機Galaxy Note Edge,規格大致上同Note 4一樣,但佢最特別係喺個邊位做埋斜邊Mon,可以顯示新訊息,亦可以將常用App捷徑放係嗰度,即使用咗Cover case,唔打開Cover都可以操控。

斜邊屏幕設計係有Gimmick,不過實用性有幾大呢?

其他配件方面,智能手錶Gear S用咗Gear Fit嘅弧面設計,更加配合手形。佢一樣可以睇到各類新訊息、接聽來電,亦可以作為運動伴侶,計跑步速度同距離。


Gear S戴上手似乎幾大隻,似手鈪多過似手錶。

Gear S除咗黑色同白色,亦有呢隻Swarovski版。

仲有Gear Circle藍牙耳機,可以聽歌同通話,有來電時會震動通知

Samsung出智能手錶、藍牙耳機呢類大路嘅手機周邊產品唔出奇,但出Gear VR就真係估你唔到。Gear VR係一副虛擬現實眼鏡 (眼罩?) ,用嗰陣將部Note 4插入去Gear VR,畫面就會變成虛擬現實效果,靠Gear VR右邊嘅觸控板控制,咁樣玩轉珠會唔會玩到頭暈呢?


應該唔會有人帶Gear VR出街用卦?

Note 4會喺10月出,最近都有啲連鎖電器舖優惠,都會做到10月尾,例如去蘇寧用東亞信用卡簽滿$3,000就有5%回贈,用銀聯雙幣白金信用卡單一簽賬滿$8,000就回8%,應該可以賺得到。另外連鎖電器舖之前做緊買手機即減價優惠,買$5,000以上手機即減$1,000,蘇寧仲減$1,400添 (指定型號),買新機就更抵,不過呢啲即減優惠隨時會變,唔知到時仲有無呢?