1月17日E-1激戰 逾20選手爭奪拳王寶座

由世界級拳王杜恆霖同武打明星錢小豪，聯同亞洲娛樂集團莊天任合辦嘅E-1 World Championship 2017，將於1月17日喺九龍灣國際展貿中心舉行，屆時超過20名選手將會上台出戰。賽事有唔少香港選手，最受矚目嘅兩名，就係本港4屆A組金腰帶拳王吳景聰，同埋 2016香港泰拳冠軍胡嘉浩。

 

▼E-1 World Championship 2017海報

 

廢青變拳王：唔打我一世後悔

 

擂台上打過一場又一場硬仗嘅吳景聰同胡嘉浩，喺拳擊事業上經過多番掙扎同搏鬥，先有今時今日嘅成就。

吳景聰讀完中三之後學拳，學拳數年，因同經理人嘅合約問題，喺當打嘅時候就要離開拳擊界。吳景聰不甘拳擊事業到此為止，最後透過法律途徑解決合約糾紛，重拾拳擊事業，開設拳館。經過不斷訓練同擂台實戰，先獲得本港4屆A組金腰帶嘅榮耀！

另一位受矚目嘅香港選手胡嘉浩則不諱言自己以前是一名「廢青」，人生冇目標，接觸拳擊後，佢嘅一生出現180度轉變，「雖然在拳擊路上，試過窮到連食飯都無錢，不過戴起拳套，令我尋回自己。未打拳前我還是一個廢青，對人生好迷茫、無目標，所以無論幾多人問我『打拳又辛苦又痛又無錢，點解要打？』我回應都係『如果我唔打，我呢一世都會後悔』。」

 

▼吳景聰決戰Michael Garraffo

 

▼胡嘉浩將與台灣選手陳禹希對陣

 

崔建邦赴菲訓練

 

為備戰E-1，胡嘉浩遠赴泰國特訓，務求盡量提升體能。上次比賽受傷嘅佢話，腳傷唔會影響表現，而且信心十足，「今次不會特別緊張，始終上過大台比賽，一定會盡全力，希望有好成績。」

除咗呢兩位香港拳王值得留意外，曾經打過業餘拳賽嘅無綫司儀崔建邦都會踏上擂台。佢為咗呢一戰，到菲律賓接受地獄式訓練。

海外選手方面， 年僅18歲嘅東亞泰拳錦標賽銅牌得主丸山龍介，同埋獲獎無數嘅Ederson Lion Macedo都係賽事兩大亮點。丸山龍介去年勇奪E-1 64公斤級別拳王寶座，今年則挑戰65公斤級別寶座，「今年的磅數提升了一公斤，對手的力量跟以往不同，但相信不會太難打，因為我訓練足夠，有信心獲勝。」佢希望喺2017年開始，就贏得一條金腰帶。

 

▼崔建邦喺菲律賓接受地獄式訓練後，將決戰英國選手