點解鼻塞越通越塞?揀通鼻產品要識揀
點解鼻塞越通越塞?揀通鼻產品要識揀
相關信用卡:

點解鼻塞越通越塞?揀通鼻產品要識揀

發表日期: 2016 年 07 月 04 日 更新日期: 2016 年 07 月 04 日 生活
作者:Yvone 二方

身為一個香港人,唔多唔少都會受到鼻敏感問題困擾,鼻水長流都算了,最大問題係鼻塞。最麻煩係臨瞓先來鼻敏感發作,一鼻塞就好難瞓着又瞓得唔好。遇上傷風感冒鼻敏感搞到鼻塞,除咗食藥之外,唔少人都會搵啲外用產品好似噴鼻劑咁,務求快啲通到個鼻。不過你知唔知,原來有啲產品可能會越噴個鼻越塞?唔知就要睇落去喇!

鼻塞係因為鼻道受到鼻腔內嘅血管腫脹,加上增多嘅分泌物而阻塞。鼻塞有好多唔同嘅成因,今次我哋集中睇吓由鼻敏感同埋傷風感冒做成嘅鼻塞嘅處理方法。
除咗食口服嘅抗敏感收鼻水藥外,唔少人都會選擇一啲外用嘅產品,例如鼻塞通、洗鼻劑、噴鼻劑等等,佢哋每款產品都係靠唔同方法去達致紓緩嘅效果。

洗鼻劑
洗鼻劑嘅目標係清洗走鼻腔嘅致敏源同埋黏液,令鼻敏感嘅情況減輕,咁個鼻就唔會咁塞。佢哋嘅成份大多係鹽水,並冇藥用成份,可以多次使用。

通鼻劑
另外一款係通鼻劑,通常含有收縮血管嘅成份,收縮鼻腔內嘅血管,令血管腫脹嘅情況減輕,從而紓緩鼻塞嘅情況。入面嘅通鼻成份大多係alpha受體激動劑 (alpha receptor agonist),佢透過作用於alpha受體,達至局部血管收縮嘅效果,改善鼻塞。常用嘅成份有 oxymetazoline, phenylephrine, xylometazoline以及naphazoline。雖然呢類通鼻劑可以有效解決鼻塞問題,不過如果長期使用,會出現反彈式鼻充血(rebound congestion)嘅情況,令鼻塞問題更嚴重。

當長時間使用呢類通鼻劑,會發現佢有效嘅時間會越來越短,當你再不斷咁噴時,就會發現鼻塞嘅問題越來越嚴重,呢個現像正式名稱叫做藥物性鼻炎(rhinitis medicamentosa),再繼續使用呢類通鼻噴霧只會令情況更加惡化。當使用呢類通鼻劑嘅時候,記得唔可以長時間用,大槪用5-7日就要停了。

薄荷用品
相信唔少人都會用過薄荷用品去通鼻塞,可能係薄荷膏或者係薄荷味嘅鼻塞通,用落去個感覺涼涼哋幾舒服,用薄荷去紓緩鼻塞都已經有好耐嘅歷史。有人會就咁聞薄荷嘅鼻塞通,亦有人會將薄荷膏搽喺心口嘅地方,亦可以加落熱水度聞蒸氣,蒸氣亦都可以紓緩鼻塞嘅徵狀。

不過翻查一啲學術文章*,之前有啲研究做過,發現薄荷用品實際對個鼻塞情況未必有改善,不過可能薄荷可以刺激到感受冷嘅受體(cold receptor),令我哋產生呼吸暢順咗嘅錯覺,實驗嘅參加者用咗薄荷產品之後,大多數嘅人都覺得呼吸有改善。

* Burrow, A., Eccles, R., & Jones, A. S. (1983). The Effects of Camphor, Eucalyptus and Menthol Vapour on Nasal Resistance to Airflow and Nasal Sensation. Acta Oto-Laryngologica, 96(1-2), 157-161. doi:10.3109/00016488309132886 

搽薄荷膏時要留意唔好搽喺好近鼻嘅位置,因為咁樣可能會令鼻腔受到刺激,令鼻塞情況更嚴重。

除咗上述嘅其他方法,仲有啲其他方法可以紓緩鼻塞:
1.保持鼻腔濕潤,可以用一啲放濕機保持空氣濕潤
2.沖熱水涼,等可以吸吓蒸氣,紓緩鼻塞
3.飲充足嘅水份,可以令鼻腔內嘅粘液濃度減低
4.夜晚可以用幾個枕頭將自己個頭墊高,咁樣或可以幫助到紓緩鼻塞嘅情況
5.避開致敏原

介紹一下市面上常見嘅產品:

安鼻靈通鼻系列

產品介紹:
安鼻靈5分鐘通鼻系列含有效成分Xylometazoline,能有效收縮鼻腔內血管,減少水腫充血,令鼻腔暢通,更有助疏導鼻黏液流走。5分鐘通晒鼻塞,長效10小時。

產品含有Xylometazoline,用作收縮鼻腔血管,不可以長時間使用,否則或會引起藥物性鼻炎。

佐藤製藥鼻寧噴劑

產品介紹:
可紓緩花粉症、鼻炎、黏膜炎、塞竇症及傷風感冒等引致的鼻塞、流鼻水(鼻黏液分泌過多)、痕癢、打噴嚏及淚汪汪。

除咗有Naphazoline HCl收縮鼻腔血管,亦加入Chlorpheniramine Maleate抗敏收鼻水成份,可幫助紓緩流鼻水流眼水嘅情況。同樣不可以長時間使用,否則或會引起藥物性鼻炎。

安鼻靈防敏潔鼻系列

產品介紹:
安鼻靈防敏潔鼻噴霧含來自法國的淨化無菌海水,每日早晚洗潔鼻腔,洗走致敏原,有助減少過敏。它更蘊含天然微量元素及豐富海洋營養,用後倍感滋潤。

 

產品內嘅其實係鹽水,靠沖走致敏原以及保持鼻腔濕潤去改善敏感情況,可每日使用。

曼秀雷敦防敏潔鼻噴霧

產品介紹:
8效鼻腔護理,即時舒緩8種不同成因的鼻腔不適,包括:花粉、灰塵、空氣污染、鼻子發癢、鼻腔乾燥、鼻塞、流鼻水引致的各種不適、改善因鼻塞引起的黑眼圈。

產品同樣係鹽水,靠沖走致敏原以及保持鼻腔濕潤去改善敏感情況,可每日使用。

曼秀雷敦薄荷膏

產品介紹:
薄荷滲透作用,迅速舒緩傷風引致的鼻塞、頭痛、胸口翳悶、咳嗽及皮膚疼痛。可將一或二茶匙薄荷膏溶於沸水中,然後徐徐吸入蒸氣可暢通呼吸及迅速舒緩鼻塞、咽喉痕癢和咳嗽。

薄荷膏可以幫助紓緩鼻塞嘅不適,帶來清涼嘅感覺。亦可以加入熱水聞蒸氣,蒸氣本身對鼻塞也有幫助。

曼秀雷敦爽鼻通

產品介紹:
能舒解因感冒引起的頭痛、頭暈、流鼻水、打噴嚏及過敏性鼻炎引起的鼻塞。

細細支方便擕帶,可以為鼻腔帶來清涼感,紓緩鼻塞嘅不適。

總結: