點止得安利！東大街大把好嘢食

今次依一站都係港島，啱啱去完太安樓今次就去同樣出名好多好嘢食嘅 - 東大街！東大街位於筲箕灣，今次介紹嘅其中兩間店鋪都係經過數十年嘅歷史繼續屹立不倒，可見一啲好普通嘅食物，要保持水準其實係一件好難嘅事，今次就帶大家去東大街尋找平凡中的不平凡！

香港老字號 - 王林記潮州魚蛋粉麵

地址：筲箕灣東大街10號東寶大廈地下A號舖
食物：香蔥魚蛋河 $29
個人評分 : ★★★★☆ (5星滿分)

▲王林記已經有超過50年嘅歷史，佢嘅魚蛋真係有特別嘅一套！大家去東大街一定會糾結諗到時食王林記好定安利好，但我好肯定講王林記一定唔會比安利差！

▲魚蛋粉大家食得多啦，但香蔥魚蛋唔係度度都有得食！將香蔥同魚蛋打埋一齊味道唔單止唔會咁齋仲好香，魚蛋有肉汁又彈牙，加上香蔥嘅關係連碗麵都特別鮮甜，真心推介！

香足整條街 - 印尼沙嗲屋

地址：筲箕灣筲箕灣東大街76D地下
食物：沙嗲豬肉、牛肉 $10
個人評分 : ★★★★☆ (5星滿分)

▲如果大家有經過東大街，相信一定會聞到成條街都有超香嘅沙嗲味！依間印尼沙嗲屋超過二十年歷史，就算要企住食都一樣會爆場，可以想像有好多粉絲㗎！

▲沙嗲辣味可以自已選擇，我之前就試過佢嘅辣，對我自已嚟講真係幾辣，所以今次我就揀咗唔辣啦！佢嘅原味沙嗲有一種好濃嘅花生香味，一流呀！

正宗韓式快餐 - 北村韓食館

地址：筲箕灣東大街76號廣信樓地下A舖
食物：韓式紫菜卷 $30
個人評分 : ★★★☆☆ (5星滿分)

▲北村韓食館就唔係老店，係東大街新進駐嘅店鋪，主打全部正宗韓式小食，好多學生哥放咗學都嚟到吸韓氣㗎！

▲紫菜卷分量都算大，而佢主打蔬菜為主，有青瓜、魚蛋、紅蘿蔔、醃蘿蔔、牛蒡等等，重點就係紫菜部份，佢地好特別地放咗麻油同芝麻令到成個紫菜卷特別滋味！

點止得安利！ 東大街大把好嘢食