麻煩的飯腳

久不久都會在網上見到一些創作小品，演繹男女朋友傾食飯的有趣對答。內容離不開是女朋友的「無所謂我咩都食」原來好有所謂，然後中、英、美、意、法、日、韓、中東、非洲菜都不合心水，最後責怪男朋友不夠細心：「人哋想食甜品丫嘛！」。大眾男仕睇得很開心，但麻煩飯腳又怎會是女朋友專利呢？麻煩起上來，男人麻煩一萬倍。

其中一句對白，應該很多人都聽過：「我煮好食過佢啦，不如返去自己煮。」但佢依然坐着食到尾，下次約食飯佢繼續「出街食」繼續話「不如自己煮」，但事實一餐都無煮過。


小弟對飲食的知識不算廣博，但自從自己做fusion菜之後，偶爾都被朋友人問：「全部你自己都識煮，你仲出唔出街食飯？」。這是一個很好的問題，每次我都很有興緻慢慢答。識煮，其實更加會出街食，因為很清楚要花多少功夫才做得一手好菜。而且出街食飯的目的和氣氛是不同的，兩者不能混為一談。至於質素，一分錢一分貨，捨得用靚料自然好食。再者，成日所謂的：「返唔到轉頭」，如果吃過一次hotel chocolat就說不能再吃吉百利，也未免太浮誇。

每個人都有自己對食物的一套標準，但要表達出自己對食物的認識和見識，也不一定要用批評去演繹，說這裡做得不好那裡用料不夠，更甚者再加一句：「我都唔明你點食得落？」。不但數落餐廳廚師，連同枱飯腳都掃射。其實你與其去指責數落個廚師，不如直接去廁所「搵嘢食」。

還一句令大家十分懊惱的對白：「我無咩所謂好易話為，你哋叫餸得架喇。」。之後會發生的事情，應該不會陌生吧？大家每想叫一味餸，「無所謂」朋友就會每一味都加意見，再補上一句：「不過啦我無所謂」。然後食物上枱，繼續彈三彈四。


不要被坊間創作小品誤導，這些絕對不是所謂的「港女」專利，男人都一樣會有這種表現，甚至有過之無不及。尤其在批評老婆阿媽煮的飯，又不想想自己連隻雞蛋也不懂煎，就來說老婆的咕嚕肉做得不夠水準。食物的好壞，有時不必太客觀的。