雲頂夢號處女下海 狂出優惠吸客

雲頂夢號處女下海 狂出優惠吸客

相關信用卡:

雲頂夢號處女下海 狂出優惠吸客

發表日期: 2016 年 12 月 25 日 更新日期: 2016 年 12 月 25 日 旅遊

作者:甦師父

麗星郵輪,有冇為你製造過郵輪遊嘅回憶?係咪已經覺得佢哋啲郵輪已經好殘,坐多次都嫌悶?正常嘅,事關麗星郵輪已變成老餅品牌了、old school了,所以嶄新嘅星夢郵輪同佢架雲頂夢號可以話誕生得合時,冇麗星嘅頹氣之餘,依家首航無耐仲做緊優惠,價錢隨時平過你報中長途旅行團。

麗星郵輪風光一時

自從麗星郵輪出現,佢哋嘅處女星號、天秤星號同雙子星號等等郵輪,打開港人郵輪旅遊嘅經驗。例如1994年加入麗星郵輪嘅雙子星號,船上有游泳池、按摩池、緩跑徑、桑拿浴室、健身室、髮廊美容院、卡拉OK、電影院、表演廳等,風頭真一時無兩。

不過歲月催人,何況機器?所謂再鋒利嘅刀都有生銹嘅一日,港人認識最深嘅雙子星號經過多年風浪後,年華老去,除咗設計已變老套,內裏嘅設施都見殘舊。當然,海上嘅鹹氣都有作用啦。

▼雙魚星號各樓層設施分布

▼雖然雙魚星號喺2011年翻新完成,但種土味始終改變唔到

▼按摩池仔,隨時你屋苑會所都有,吸引力唔大

麗星免費餐好難食

筆者最近果次搭雙子星號,因為畀嘅錢唔多,住嘅層數較低,結果夜晚聽住引擎嘅轟轟聲,成晚都瞓唔着。船上係有幾間免費嘅餐廳,早餐、午餐、下午茶、晚餐同宵夜都有,但味道真係唔掂,唯有畀錢去收嘅餐廳先對得住味蕾,筆者懷疑佢哋故意整到免費嘅嘢難食,迫你畀錢食好嘢!

當然,搞郵輪係一盤生意,筆者都唔渴求「上得船嚟牽被冚」,只係唔想借副麻雀、唱吓K、睇啲有少少質素嘅表演都要吓吓畀錢。最差嘅係,一日未上船,你就算點問,啲接線生都唔會答你使用設施嘅收費係幾多,結果旅程難免over budget。仲有船上啲workshop活動,都係要錢,你估我落到賭廳就一定嬴到一筆返嚟畀旅費咩?

雲頂夢號係新 但去得越南咁近

麗星郵輪老了,最近嶄新嘅郵輪品牌星夢郵輪,佢哋架雲頂夢號喺上個月首航。架船勝在夠新、設計冇麗星郵輪果啲老套味之餘,都幾豪華吓。雲頂夢號以廣州南沙同香港為母港,兩地都上可以船,明顯有部分係針對大陸人生意啦。

雖然架郵輪好似好勁,排水量話有15.1萬噸、有18層高,坐3,400名遊客、2,000名船員之類,又有近1,700間客房等等,但暫時得星期五出發嘅3日2夜香港周末遊同逢星期日出發嘅6日5夜去越南,唔去遠啲,真晒料。

▼雲頂夢號有18層樓高

▼最巴閉係有滑水梯,免費

▼迷你高爾夫場,免費

熱線打十九幾萬次都打唔到

筆者打電話去星夢郵輪查詢雲頂夢號有咩嘢玩,發現電話同麗星郵輪個電話係一樣,兩間公司嘅關係顯而易見啦,不過撳去星夢郵輪,試過十九幾萬次都話線路繁忙,撳去麗星郵輪又話唔知星夢果邊係點,咁嘅服務質素,真係想講句粗口cut線。

話雖如此,星夢郵輪汲取咗麗星郵輪多年嚟嘅慘烈經驗,所以喺房間上確係花咗唔少心思。佢哋嘅貴價房間分做帝庭總統套房、星夢行政套房、星夢豪華套房、星夢套房、皇宮套房等,所有房間都有平板電腦、歐洲牌子嘅床上用品等,都幾似住五星級酒店嘅,唔係好似麗星郵輪咁,稍為畀平啲房錢,就住得似水手多過旅客。

▼​帝庭總統套房設計豪華

​▼​星夢行政套房也不錯

大部分玩樂設施免費

好喇,除咗房住得舒適,餐廳煮得出色,表演廳玩得出色等等,呢啲價錢反映質素嘅嘢之外,雲頂夢號仲有乜特色之處呢?就係喺船上頂樓船尾同16樓船尾有分別畀大人同小朋友玩嘅水上滑梯樂園!你哋知唔知最大好處係咩?係免用全免,唔會好似麗星郵輪咁玩乜都想吸人血咁!

又唔單止呢樣吸引嘅,船上嘅繩索場、攀岩牆、迷你高爾夫場都係免費,仲要集中喺18樓船尾,玩完一樣又一樣,都幾方便。

你唔怕麗星郵輪免費餐廳啲嘢難食,總唔會餓親,夢頂夢號又點會差得過佢呢?雲頂夢號有雲頂宮同星夢軒兩間免費餐廳,仲有麗都自助餐廳,要畀錢嘅就主要有星夢美食薈、海馬日本料理、馬克•貝斯特星廚等等,咁當然要畀錢食嘅會好食過唔使錢啦。

​▼​麗都自助餐廳係雲頂夢號其中一間免費嘅餐廳

​​▼​馬克•貝斯特星廚主打西餐,喺度食嘢要收錢架,味道梗係好啲啦

處女落海不久 勁多預訂優惠

雲頂夢號首航無耐,服務一定會做好啲嚟先聲奪人,所以佢哋依家推出優惠,6日5夜嘅越南行程,2人同行,1人半價。咁即係點?以最平嘅內側客房為例,首位客人房價係$5,935起,但正常又點會一個人上郵輪咁毒?所以同行嘅另一名客人,只需要$2,968就可以一齊上船喇,咁即係最平$8,903就可以1 pair人喺船上玩足6日5夜,平過一般旅行社嘅中長線團費架,但係不適用於12月25、1月1月、1月29同2月5號囉。

覺得太貴嘅,可以選擇3日2夜喺香港附近海域打個白鴿轉嘅航程,最平嘅內側客房係$1,999起1位,隨時平過去澳門夾埋嘅酒店、船飛同三餐嘅價錢。

​▼​6日5日越南之旅,二人同行,一人半價

▼3日2夜嘅都有得平

​依家星夢郵輪想打響雲頂夢號嘅頭炮,優惠點只上面呢個?依家用恒生卡透過美麗華旅遊,喺2017年1月31或之前報名星夢郵輪嘅船票,部分出發日期有折扣;越南6日5夜門巿報名畀埋錢減$100,網上報名就減$200;香港海域打白鴿轉嘅,門巿報名減$50,網上報名減$100,詳情請按此

唔單止架,依家用銀聯卡預訂仲有額外勁減,2晚遊可勁減$300,5晚越南遊就勁減肥800,詳情按此。