陽明山莊自成一國 明星隱居之選

有傳媒報道Fiona薛凱琪同富二代男友Byron鄧浩基拍拖3年，仲畀人催婚添，如果真係拉埋天窗，筆者當然要登年屆35嘅Fiona開心啦，話晒人哋男仔有公司同豪宅揸手，未來老爺又係低調富豪鄧邦，咁大條水喉射注，Fiona息影，安心做少奶奶都未嘗不可。

不過同Fiona拍拖嘅係Bryon，唔係佢老豆，所以睇吓佢Bryon咩料子始終都重要嘅。

 

▼陽明山莊屹立喺大潭，仿如世外桃源

 

男友$3,550萬買陽明山莊 用嚟結婚住？

報道話鄧浩基Byron同老豆持有加拿大教育顧問有限公司以及中聲有限公司，咁即係仲同老豆學緊做生意啦。Byron都有買賣開物業，報道話佢2009年就以$5,500萬買入寶馬山花園物業，2015年轉手賺$300幾萬，賺得「唔算多」。之後佢喺2014年用$3,550萬買入大潭明山莊單位，唔知係咪因為果頭鄰近多所國際學校，可以方便佢同老豆嘅教育生意。

筆者翻查陽明山莊喺2014年嘅交易紀錄，發現喺7月尾，屋苑嘅摘星樓14座正好有個以$3,550萬轉手嘅紀錄！單位實用面積1,441方呎，買入時實用呎價$24,636，係當時嘅高位。上手業主喺2007年11月買入，持貨6年幾先轉手，帳面賺5成！不過以今日呎價睇返，個單位都係升得果幾十萬。

 

▼薛凱琪與房祖明，兩人之情早已不再

 

▼因為薛凱琪條頸睇落去幾長，早年引來網民改圖

 

▼早年有網民發現薛凱琪與某地方土著非常似樣

 

 

隱世富豪屋苑

陽明山莊近排個巿況係點呢？首先成交數唔多，11月成交宗數得4宗，10月得果2宗，9月仲得果1宗。近期有巿場消息指，摘星樓14座實用面積1,624方呎圓廳望維港同水塘景嘅大戶單位，以$3,930萬成交，實用呎價$24,200。租方面，8座一個中層實用面積1031方呎、2房2廳1套房嘅望山單位，原本叫租$50,000，但最終$48,000成交，實用呎租近$47，冇乜特別。

Bryon本身住渣甸山，唔知佢買陽明山莊係自住定投資啦，事實上陽明山莊自成一國，屋苑有大型會所，泳池、健身室、網球場等一應俱全，仲有幾間餐廳、宴會廳，附近仲有達官貴人仔女讀嘅國際學校同幼稚園，好多唔想出街同人迫嘅明星都曾經住喺度，好似張栢芝、鄭中基等。如果，筆者講如果，Fiona同Bryon真係拉埋天窗，住喺陽明山莊都算係一個唔錯嘅選擇，如果位置方便埋男方嘅教育生意就更好啦。

不過要注意嘅係，整個陽明山莊雖然後生過Fiona，但屋苑都就快成30歲，摘星樓已有28年樓齡，屋苑設計雖然豪華，但今日睇落難免有啲老套。如果Bryon買嚟同Fiona自住，筆者覺得佢體貼，兩年前入巿正確啊！

 

▼陽明山莊屋苑內一應俱全，明星住客唔落山都唔怕悶

 

▼屋苑門口得一個，平時甚少非住客嘅閒雜人進內

 

同港島屋苑比一比

Bryon用$3,550萬買入陽明山莊單位，到底化唔化算？咁就要睇吓其他呎價差唔多嘅豪宅屋苑情況係點。依家就比較吓同樣以過千方呎單為主、售價$3,000至$4,000嘅港島區豪宅屋苑。

因為南區早前起地鐵，港鐵南港島綫將會喺年底通車，所以有站嘅黃竹坑同鴨脷洲呢幾年起咗唔少所謂嘅豪宅，包括黃竹坑嘅「深灣九號」、鴨脷洲嘅「南灣」同啱啱開售冇耐嘅「南區·左岸」。

深灣九號雖然鄰近地鐵站，但因為黃竹坑邨一早拆咗，周邊除咗個公共泳池同個巴士站仔，可以話全無配套，日後車站上蓋或周圍再起住宅，咁深灣九號就會成為區內「舊樓」，當然冇得同新樓比，呎價或會下調，依家買唔值得囉。

 

大坑都有唔錯選擇

至於鴨脷洲嘅「南灣」同「南區·左岸」，唔係傳統豪宅區囉，仲要對住樓下個船廠，但勝在係新樓，外型比陽明山莊時尚，而且附近有港鐵站咁囉。

另外，數碼港嘅貝沙灣都係名人聚居地，但一嚟筆者唔鍾意貝沙灣整體設計，二嚟因為有戲院，同大型放狗草地，假日有唔少區外閒人入嚟，我係明星就唔會特別想住。但何韻詩、張家輝同方力申都曾過喺度囉。

講完南區，咁港島仲有邊度都啱明星住嘅屋苑呢？其實筆者覺得大坑係一個唔錯嘅選擇，好似果度嘅名門，居高臨下，有單位望維港，有單位望山，環境清幽之餘，上落條大坑道就連接銅銅灣同天后，揸車出入方便。唔係名門嘅話，大坑仲有嘉雲臺都係唔錯選擇。

 

▼筆者認為，對明星嚟講，同陽明山莊有得比嘅有大坑嘅名門