阿旦開按摩店 唔怕人想入非非

鄧洢玲（阿旦）忙於幕前工作嘅同時，依家仲同閨密投資過百萬，做埋按摩店老闆。生意處於起步階段，阿旦需要多啲積蓄旁身，就算要出席活動，都會迫巴士搭地鐵，慳返的士交通費用。

 

提供租場服務

 

阿旦做老闆之前，會趁到外地進行拍攝工作嘅機會，試吓當地按摩店嘅按摩手法，研究環境佈置等。及後構思開按摩店，阿旦希望塑造hip hotel嘅感覺，打造一間獨特、女性化同舒適嘅精品按摩店，即係今日嘅「Blossom – The Secret Garden」。

面積有1,500平方呎嘅按摩店位於銅鑼灣地鐵站出口隔籬，交通方便。鬼主意多多嘅阿旦諗過，店鋪可以畀客人租場，搞埋生日派對，賺取額外收入，「（客人）可以一齊按摩，按完摩（我哋）可以幫你嗌到會嘅食物，或者set個場畀佢哋影相，開心吓。」

 

▼按摩店grand opening當日，不少親朋好友嚟到賀

 

▼唔少得同老闆娘合照啦

 

為慳錢 着高踭鞋迫巴士

 

開按摩店花咗多年積蓄，坦言營運開支「每一日都好似燒緊銀紙」，仍在守業嘅阿旦唔敢亂使錢，「有多啲積蓄旁身，你個人先冇咁慌。」所以佢依家少咗搭的士，就算需要着住高踭鞋出席活動，都會選擇迫巴士搭地鐵，節省交通支出。加上阿旦生活唔奢侈，唔好名牌，除咗食同住，其他使費都做到慳得就慳。

生意雖然處於起步階段，但阿旦同拍檔已經諗過，若賺得滿意嘅盈餘，會考慮開分店，增加身體按摩嘅房間，同時設置按摩池等，打造設備更完善嘅按摩店。再進一步，如果開分店後再賺到錢，「食嘢我冇難度」嘅阿旦會考慮進軍飲食界！

 

▼做過娛樂新聞台主持，現在做藝人兼老闆，終於嘗試到接受訪問嘅滋味

 

唔怕男客人想入非非

 

性感o靚模形象揮之不去，阿旦開按摩店，怕唔怕某啲男客人想入非非？阿旦話，開店至今嘅短時間未遇過上述情況，若果真係遇到嘅話，都有方法應對，一啲都唔擔心，「你係咩目的先？如果想見吓我同我影張相，我同你影囉。但果你想按摩，幫襯嘅話呢，緊係交畀專業嘅師父。」

不過因為阿旦嘅精品按摩店裝修較女性化，反而有客人以為按摩店係美容院，且只招待女賓，但其實男女客人同樣歡迎。要注意嘅係，阿旦只係鍾意揼骨嘅「骨精」，「但我自己真係唔係一個專業嘅按摩師，所以我自己真係冇提供（為客人按摩）呢個服務。」

 

▼日後按摩店生意賺到錢，阿旦打算開另一間面積更大嘅分店