開賣5日玩完?iPhone 6炒價大跌
開賣5日玩完?iPhone 6炒價大跌
相關信用卡:

開賣5日玩完?iPhone 6炒價大跌

發表日期: 2014 年 09 月 23 日 更新日期: 2014 年 09 月 23 日 購物
作者:炸雞波

到今日為止,iPhone 6正式開賣已經第五日,除咗頭三日有機喺手又放埋嘅朋友比較開心,亦應該會慶幸早有機又早放。如果而家仲Hold緊機,應該心都實晒,因為呢兩日香港同大陸個回收價都跌咗好多,香港個價更加好似股災咁樣直線插水。


以iPhone 6 16GB為例,香港價由21號$8,000,跌到琴日$7,000左右,再夜啲更低開$6,600,賺$1,000左右,大容量機價同16GB大幅收窄,跌到只有三、四百蚊賺;而貨量少啲嘅6 Plus亦一樣跌,16GB已經跌破$10,000,去到$9,000,到$8,000都有人開價,大容量就好少少,仍然過萬。至於iPhone 6 16GB大陸賣價由第一日到第三日,都係每日跌兩三百,琴日就由人民幣$7,500跌到$6,800。今日係第5日,照呢個趨勢,大容量機有可能跌穿IPO,開始要蝕錢,仲Hold緊機嘅朋友唔知有咩睇法?而係呢個回收價愈來愈低嘅情況下,又變成機票黨嘅天下,冇乜錢賺繼續訂機放機賺積分里數換機票。

琴晚我路經旺角,順便去先達行咗一轉,場入面普遍都收金色,至於其他型號就間間唔同,寫張紙貼喺門口,或者店員開口話只收咩容量咩顏色,其他型號就停收。至於隔籬百老匯門口,除咗收機檔,仲有人手持一盒盒iPhone等人嚟問價,不過我入去先達前見到佢哋,到我行完先達走嗰陣都仍然企喺度,似乎賣唔出,第一水就要企街求賣,真係估佢唔到。

百老匯門口仍然塞爆。

個價跌得咁急,有人 (特別係先達人) 話係因為好多人見大陸個價高,就走上去放機,搞到大陸手機舖同炒家直接收到機,少咗同香港攞貨,或者開低價收購,回收價自然跌同停收。但亦有人 (特別係炒家個體戶) 反指先達舖頭食水深,個價低大陸咁多,梗係北上放機賺多啲,如果香港個價夠高,就唔會咁多人上去放機。呢個似乎係一個惡性循環,其實有錢賺係人都想賺多啲,先達舖頭係做生意,燈油火蠟舖租人工運費都係成本,放機比佢哋可以慳返北上嘅時間同降低風險 (例如被海關捉到),佢哋個價比大陸價低啲係情有可原,至於佢哋所謂嘅成本值唔值呢個差價,食水深唔深,應唔應該賺少啲,提高個收機價俾你食埋佢,就見仁見智喇。

不過我喺呢度再次提醒大家,帶未完稅iPhone過關,被人搜到係等同走私,要交稅罰錢兼有可能扣留啲機。據中國新聞網報導,19號至21號期間,皇崗同福田關口捉到36宗走私iPhone案,非立案有四百幾宗,扣留iPhone 6同6 Plus 六百幾部,有人用食物包裝盒偽裝,有人揸車上去收埋喺椅背、扶手儲物格,一樣被捉到,搏唔搏得過真係要諗清楚。