里數入門班 航空聯盟簡介

講起儲里數，唔知你會諗起邊個飛行里數計劃？香港人多數都會諗起「亞洲萬里通」，主要係因為佢屬於國泰，國泰以香港做基地，用佢儲里數換機票比較多航線選擇；二來信用卡儲到嘅多數都係「亞洲萬里通」里數。當然，除咗「亞洲萬里通」，其他航空公司都有自己嘅飛行里數計劃，某啲航空公司組成飛行聯盟，除咗有航班共享，仲可以用里數去換聯盟成員嘅機票，今次就同大家簡單講下飛行里數計劃同埋航空公司聯盟嘅關係。

三大聯盟
目前主要有三個航空聯盟，包括「oneworld寰宇一家」、「Star Alliance星空聯盟」、「SkyTeam天合聯盟」，各自有唔同嘅加盟航空公司。

除咗搭飛行里數計劃所屬航空公司嘅航班可以儲到里數，搭同一聯盟其他航空公司嘅航班亦可以儲里數，例如搭日航香港飛飛東京嘅航班，可以將積分儲落JAL Mileage Bank，亦可以揀儲落「亞洲萬里通」戶口。

坐日航，里數儲蓄落Asia Miles。

另外，用A里數換聯盟成員B機票，可以換到原本A航空公司冇做嘅航班，比較經典嘅例子有用英航Executive Club Avois換國泰 / 港龍營運嘅香港飛台北機票，原本需要15,000「亞洲萬里通」里數，經英航Executive Club用9,000 Avios就換到。

短途用Avios換機票比較抵。

oneworld寰宇一家
oneworld包含一啲香港人常搭嘅航空公司，例如國泰 / 港龍、英航、日航、澳航、卡塔爾航空、馬來西亞航空等等。由於有國泰 / 港龍，香港出發航班多，搭飛機易儲里數，加上唔少信用卡都儲到，所以「亞洲萬里通」都係香港最熱門嘅飛行里數計劃。而換短途比較抵嘅英航Executive Club，大新有英國航空白金卡、匯豐卓越理財信用卡、Citibank指定信用卡都儲到，適合經常飛短線嘅人。

Star Alliance星空聯盟
Star Alliance有最多航空公司參與，亦有唔少香港人熟悉嘅名字，好似聯合航空、長榮、全日空、韓亞、新加坡航空、泰國航空、中國國際航空、漢莎，仲有一啲中南美洲同歐洲航空公司，同埋近期唔少人留意嘅埃塞俄比亞航空。匯豐卓越理財信用卡亦可以儲KrisFlyer里數，本來中銀都有張新航聯營卡，不過已經冇得申請。大新有ANA香港白金Visa卡 ，Citibank指定信用卡亦可以換到新航、泰航、長榮等嘅里數。

SkyTeam天合聯盟
雖然SkyTeam係第二多航空公司參與聯盟，但香港人常搭嘅航空公司就少啲，都係得大韓、華航、達美、嘉魯達、KLM，亦只係得Citibank指定信用卡亦可以換到達美、嘉魯達、法航嘅里數，對於香港人嚟講，都有啲難儲。

廉航新聯盟
以上嘅航空聯盟多數都係傳統航空公司，咁廉航又有冇聯盟呢？答案是有的，都係最近先宣佈成立。

Value Alliance由8間廉航，包括Cebu Pacific、濟州航空、 Nok Air、NokScoot、酷航、虎航、虎航澳洲、香草航空組成，航點覆蓋亞洲同澳洲主要城市，將來可以喺任何成員網站訂到其他成員嘅接駁航班同埋其他機上服務。

仲有U-Fly Alliance係由HK Express、祥鵬航空、烏魯木齊航空同西部航空組成，一睇就知係中國同亞洲航線為主。
暫時兩個廉航聯盟都只係透露咗可以訂埋聯盟航班，暫時仲未知可唔可以用里數換埋機票，特別係HK Express最近都出咗reward-U獎賞計劃，搭飛機可以儲分換機票，不過連HK Express點換自己機票都未公佈，睇嚟仲有等一段時間。

好喇，今次就講到呢度先，之後會逐個講下飛行里數計劃嘅詳情。