鄧兆尊灣仔舊樓藏3嬌 萬五蚊1嬌值唔值？

一諗起鄧兆尊，大家可能諗起佢上「獎門人」，或者喺電視電影做閒角嘅畫面。雖然佢演藝事業發展平平，但勝在投資有道，多次炒賣住宅舖頭獲利，估計身家以億計。另外，佢有3個女朋友，分別都係住喺灣仔，所以鄧兆尊金錢愛情兩得意，幾令人羨慕架。佢有錢一回事，筆者想計吓，喺灣仔一帶藏嬌，入場費要幾多？

 

3房同住灣仔 方便兆尊來往

 

喺傳媒明查暗訪之後，鄧兆尊共3房嘅女友全部曝光，包括正印Carmen、2房車厘子同據稱係骨妹嘅三奶。妻妾如何和平共處係自古以嚟嘅難題，不過鄧兆尊竟享齊人之福，3房可以一齊行街食飯，有講有笑。

雖然3女共侍一夫，但佢哋分開住架，好似正印Carmen就同鄧兆尊住喺摩理臣山道永祥大廈，車厘子住菲林明道，三奶住駱克道，都係灣仔範圍，方便鄧兆尊來往。

 

▼鄧兆尊（左）與他已過世嘅爸爸新馬師曾（本名鄧永祥）。

 

傳身家以億計

 

唔好以為近排少見鄧兆尊上電視，佢就養唔起3個女友。首先佢老竇新馬師曾（本名鄧永祥）作品嘅版權收入係佢哋幾兄弟姊妹嘅收入來源，另外鄧兆尊本人投資有術，據傳媒報道，佢喺2004年賣咗筲箕灣地舖，套現$700幾萬，又賣出$1,300萬半山豪宅。另外佢又同富豪名媛合夥投資過茶樓物業獲利，估計身家以億計。鄧兆尊有錢又享齊人之福，真令人羨慕。

不過，新馬師曾留畀後人嘅3項重要物業，即係永祥大廈、筲箕灣嘅楚留香酒樓舖位同西貢40,000方呎地皮。當中永祥大廈早已喺2003年以近億元價錢被東華三院收購，所以有理由相信，鄧兆尊同正印住嘅單位，唔係自己物業。

 

▼電影中的鄧兆尊，多數做搞笑角色。

 

租定買樓藏嬌化算？

 

鄧兆尊演藝事業平平，卻喺物業巿場投資上有斬獲，3名女友同住灣仔而冇勢成水火，值得一讚。究竟要喺灣仔一帶買或租樓「藏嬌」，入場費要幾多？藏得嬌嘅，劏房咁霉又點藏得住呢？依家樓價咁貴，筆者唯有將範圍收窄至樓價$450萬以下，實呎起碼300方呎嘅單位；若果係租嘅，就預算租金$15,000以下，睇吓最平可以點藏嬌法。至於位置方面，就鎖定莊士敦道同告士打道中間一帶舊樓。

 

買

▼喺灣仔買間唔太細嘅舊樓單位，都要成$400幾萬。

 

租

▼如果真係藏嬌（筆者強調做人用情要專一），可能租樓好啲。

 

你知啦，感情同租約一樣都有個限期，突然唔想藏嬌而離場嘅，都唔會話好大損失，而租樓唔使畀稅，退場又易，灣仔一帶都有唔少質素唔錯嘅舊樓放租吖。$15,000可以喺灣仔租到四正嘅單位藏嬌，交通方便。化唔化算？見仁見智啦，筆者總係建議做男人要用情專一，特別係打死一份牛工，又唔識投資果啲，冇咁大個頭，就唔好戴咁大頂帽。