進撃之9A狀元車長

人，冇夢想同條鹹魚有咩分別呢？有感而發，皆因最近突然爆出的9A狀元車長一事。

要拎到9A(而家係唔係應該叫5**？)，就算水公主我再花多N個十年，相信都係冇可能既事。求學不是求分數，從來都係假話。如果唔係點解每年放榜，傳媒唔係走去關心操行好到爆燈但成績差到唔見得人既學生，而係大篇幅報導十優九優生？所以，當一個9A狀元大拿拿4萬幾蚊工唔做，話要追求夢想揸巴士，就好似變左做特種新人類，異族也。

睇新聞話甚至有人而家當左佢係星，專登走去搭佢開既巴士；將佢本人，當成一個景點咁去觀光朝聖。老老實實，9A車長又唔係開巴士開到識飄移，乜佢地冇睇到有通告話行車時切勿與司機談話架咩？我覺得，與其話佢地係崇拜9A狀元車長，不如話佢地只係相當佩服於人地敢作敢為、活在當下的生活態度。

       
                 當阿源成功脫毒都係新聞，呢個社會到底發生咩事？水公主巧驚驚

我唔係唔明白點解有咁多人會概嘆佢係十字街口前會咁樣選擇自己既命運，先得果廿零歲仔，前途似「咁」，唔通揸巴士可以揸成世？

係，佢好可能好快發現理想同現實既差距，不過佢有實現自己夢想既勇氣！好似當日覺得自己係零既阿源咁，當佢識得踏出第一步去面對時，樣貌、高度同學識都唔再係問題，這些機會，根本係屬於所有人的！當然，我並非好傻好天真到以為呢個世界上人人都可以100%成功，就正如SHAKE SHAKE朱古力熊仔波咁，唔係肯付出勞力，就一定有成果。但唔試同冇夢想，就真係同喪屍冇咩分別。(OK，唯一分別係唔會咬人囉。)可悲既係，今時今日喺香港，有勇氣追夢已經可以上A1。

       
      睇黎樂天熊仔餅好快要作過新廣告標語——「樂天熊仔餅，新奇、SHAKE得又食得、好玩！

P.S. 《進撃之巨人》同呢篇正文有冇關係？有！個男主角同9A狀元車長一樣咁熱血同為實現自己所思所想而努力囉，個世界(觀)仲一樣咁黑暗添！其實講咁多，只係想講，《進撃之巨人》真係好好好好好好 X 10,000睇呀！！