進入童話世界～ 德國童話村

CC我係個好鍾意童話世界嘅人，越唔真實嘅野，就越鍾意！所以今次聽到赤柱廣場德國聖誕市集將以格林童話為主題，真係雙眼都變左心心呀！其實德國聖誕市集上年已經非常受歡迎，所以今年繼續得到德國駐香港總領事館同德國商會嘅支持，將市集打造成德國童話村，真係好適合我呢啲少女呀哈哈!（扮後生）

市集有各式各樣嘅德國美食同工藝品，但當中最搶眼嘅當然就係一座5米高嘅糖果屋啦！

• 哇！好Pinky好靚啊！呢個1:1嘅糖果屋外型十分可愛，五顏六色，見到佢呀心情都靚曬！

• 唔好以為佢得個樣，原來入面有千支手工波板糖組成嘅七彩水晶燈，而且仲提供全港首個波板糖自助餐，真係女仔們嘅打卡聖地！想參加波板糖自助餐，就要係12月1-18日期間於赤柱廣場及德國童話村聖誕市集內以電子消費滿 500 港元(最多 2 張單) ，之後就可以換領波板糖自助餐參加證一張。但每日名額得96個，要先到先得！

至於美食方面，市集有各式各樣嘅德國傳統美食，有甜有鹹。但CC我就推介德國燒豬肘同蝴蝶餅。

• 脆皮燒豬肘配酸野菜（＄60）就咁睇已經好吸引！食落口外脆內軟，再配埋芥末醬真係非常惹味呀！而且仲有酸菜提供，可以解膩。
• 個人評分：★★★★☆（五星滿分）

• 芝士煙肉蝴蝶餅（＄40）有好濃嘅芝士味，同煙肉碎非常夾！但整體有少少偏鹹，所以鍾意食清淡啲嘅朋友就未必適合食了。
• 個人評分：★★★☆☆（五星滿分）

• 市集仲有好多工藝品同手作。當中最吸引我嘅就係聖誕故事塔。因為每一個塔都有自己嘅故事，例如係耶穌出世嘅故事或者係一啲街景。

 

德國童話村聖誕市集

日期:10-11/12 及17-18/12 (一連兩個星期六及星期日) 

地點:領展赤柱廣場天幕廣場

開放時間:中午 12 時至下午 8 時