「週未好Hea處」,最後一次送上滿載聖誕氣氛打卡熱點!

「週未好Hea處」,最後一次送上滿載聖誕氣氛打卡熱點!

相關信用卡:

「週未好Hea處」,最後一次送上滿載聖誕氣氛打卡熱點!

發表日期: 2016 年 12 月 02 日 更新日期: 2016 年 12 月 02 日 生活

作者:Arthur

終於都入到12月,嚟聖誕節已經差唔夠一個月,由於會搞聖誕活動嘅商場/場地都已經接近全部開始,所以今個禮拜將會最後一次送上聖誕打卡熱點! (其實應該夠大家直接玩到新年XD),如果能夠作為大家去玩嘅參考,就實在太好啦! 廢話少講,即刻入正題!

 NO.1:
正式亮燈! 幻彩藍光於沙田流轉

每年慣例都會以浪漫風格的光影裝置為主作聖誕佈置嘅新城市廣場,今年當然唔會令一眾追求浪漫嘅情侶失望。今年新城市廣場嘅主題係「璃光星河 Milky Way In Town」,到時會有一條由紫、海藍嘅光影同燈海組成嘅河,大家可以將廣場準備好嘅璃光星願球放入星河中許願。

不過留意要入手璃光星願球係有條件喎。只要於場內以電子貨幣即日消費任何金額,即可體驗放璃光星願球乙次。而逢星期五、六日及公眾假期,同樣以電子貨幣即日消費滿港幣800元(憑單一機印發票),更加可以親自製作璃光星願球添。(每日名額100個,先到先得,換完即止。)

璃光星河 Milky Way In Town
舉辦日期:即日至2017 年1月15日
開放時間:12:00 – 22:00pm(18/12至3/1/2017)/逢星期五、六、日及公眾假期將延長至23:00
舉辦地點:新城市廣場1期7樓星光花園

 NO.2:
去屯門睇晒迪士尼一眾美女公主

夢幻嘅聖誕節節……同迪士尼嘅形象好襯哩。不過聖誕去迪士尼肯定多人到爆……

不過而家屯門市廣場都有迪士尼喎,重要係有女目及(被拖走--)今年屯門市廣場就以「Dream Big, Princess夢想無限」為主題,迪士尼嘅四位公主(白雪公主(Snow White)、灰姑娘(Cinderella)、艾莉奧(Ariel)、睡公主(Aurora)、貝兒(Belle)及長髮公主樂佩(Rapunzal))將會齊齊「出張」去到屯門市廣場同大窕過聖誕喎。配以各自專屬嘅場景,直情好似去咗現場一樣!

而12月3、17、26號都會有「故事分享時間」,12月11、18、25同1月1日更加可以有機會同真人長髮公主樂佩(12月11日)、睡公主(12月18日)、艾莉奧(12月25日)同灰姑娘(17年1月1日)合照添,只要捐港幣$50到「愛心聖誕大行動」,或於商場內任何兩間不同商舖以電子貨幣消費滿港幣$1000,就可以於指定時間同幾位公主見面兼合照留念!

Disney《Dream Big, Princess夢想無限》 
舉辦日期:即日至2017 年1月2日
開放時間:10:00 – 22:00

舉辦地點:屯門市廣場1期1樓中央廣場

NO.3
空襲警報! 太古城有大量可愛小熊空降!(咦?

去完屯門,大隊又要即刻過海去到太古城啦。今次要睇嘅係……重天而降嘅熊仔? 冇錯! 今年太古城中心以「可愛熊仔為主題」,除咗商場內掛滿大型熱氣球同近50隻色彩繽紛、趣緻可愛嘅小熊造型裝置外(特別係二樓中庭設有高達10米嘅大型熱氣球音樂盒同兩隻大型小熊!),冰上皇宮溜冰場更加會有大型熱氣球做裝飾,而可愛巨型小熊更會不定時現身冰上皇宮同大家溜冰添。

留意只要於12月15日至2017年1月2日期間,憑購物消費有機會同時得到英倫品牌Fortnum &/Mason尊貴禮盒及高達3000的飛行里數啊。

2016「LOOK UP LIVE HAPPY熊天而降樂聖誕」

舉辦日期:即日至2017 年1月2日
開放時間:10:00 – 22:00
舉辦地點:香港太古城道18號太古城中心1樓、2樓及4樓

NO.4
去荃灣,又有大口仔,又有東京鐵塔!

「聖誕我要睇東京鐵塔! 要睇六本木燈海,重要去新宿打卡。」你另一半臨聖誕先同你咁講,你心諗:「有錢都唔見得有假,有假都唔見得有機位。」如果你打算「搏一搏,睇下單車係咪真係會變摩托」不妨可以帶佢去荃灣。(信者失救,請慎重考慮。)

而家荃灣廣場就搞緊「MINNA NO TĀBŌ 點亮東京聖誕夜」,入面唔單止有齊六本木聖誕燈海(小型)同東京鐵塔(4.5米…)及新宿商店街,重多咗雪地溜冰場、築地壽司吧同一大堆大口仔當BONUS,非常有心思! 就算另一半炸形,見到可愛嘅大口仔一定即刻HAPPY返晒!!

MINNA NO TĀBŌ 點亮東京聖誕夜
舉辦日期:即日至2017 年1月8日
開放時間:10:30 – 21:30
舉辦地點:荃灣廣場1樓長廊