速攻南港島線行山徑 親親大自然!!

速攻南港島線行山徑 親親大自然!!

相關信用卡:

速攻南港島線行山徑 親親大自然!!

發表日期: 2017 年 01 月 06 日 更新日期: 2017 年 01 月 06 日 旅遊

作者:Arthur

又係週末好Hea處時間! 上個星期講完離島遊,唔知有幾多朋友去咗呢? 不過有巴打就反映離島好遠,坐船勁燒時間,坐船又大風又辛苦等等等等……所以為咗配合具香港特式嘅「親親大自然」,今個禮拜就俾兩個再「就腳」啲嘅路線俾大家,進取嘅朋友可以一日「攻陷」晒兩個地方喎!

香港仔上、下水塘

以往行香港仔水塘通常有兩條路線,由灣仔峽起步(警隊博物館),行郊遊徑30分鐘左右,或者由香港仔天后廟上,都係30分鐘,兩條都適合「親親大自然嘅朋友」。不過最近南港島線開通,就梗係要配合下啦。於是今次就介紹一條要行1小時以上嘅「例外路線」。

其實條路線小編都係喺網上睇返嚟嘅,邊個網就唔講啦,不過小編去嗰日就見到5、6對情侶睇住同一篇文迷路囉。所以而家就講下點行啦。



首先大家要有個共識,去到水塘唔等於只到水塘,好似下圖咁,個終點雖然寫住香港仔水塘,但其實離你見到水塘其實仲有成粒鐘路程。

出左黃竹坑站後沿天橋過對面,再上樓梯,之後會見到對面馬路有條維修通道入口。


不要問只要信! 雖然條路好唔似路,但係你仍然要按箭頭方向走到盡頭,而後轉後往上走到盡頭,穿過一個沙路斜坡就會入到引水道邊嘅行山徑,緊記! 上斜坡後要轉左!


大約20分鐘後就會見到分叉路,由於已經係行山徑範圍內,跟指示行就冇問題,不過黃竹坑入基本係先入上水塘,再由下水塘出,所以仲要上多半小時山啊!

香港仔上水塘

香港仔下水塘

最後由天后廟撤退,其實駕車人士經天后廟係直接去到下水塘邊的(或者香港仔坐往石排灣嘅小巴也可以)(汗)

玉桂山

玉桂山以往除咗邨內人士外真係唔係太多人去,因為玉桂山位於鴨脷洲,交通認真唔方便,唔常行山嘅人唔會特別上去,經常行山嘅人寧願去其他地方行,令到玉桂山以往都係以區內晨運客為主。不過自從南港島線開通,加上有打卡假期網講過之後,1月第一個週末就已經有以往成個月嘅人流XD。

留意返玉桂山係有分主同副峰,而有行山友係習慣稱副峰為「假玉桂山」,而兩者可以咁樣識別:

1

玉桂山99%路段係保留原始地貌嘅碎石路,而且入山時有3條路線可以選擇,認住個黑色牌就唔會行錯;而「假玉桂山」就係全程靚靚石屎行山徑,非常易行,非常適合晨運。





2
「假玉桂山」係有4枝標高柱,而玉桂山只有山頂嗰1枝。


只有這是屬於玉桂山的

3

玉桂山係一個連島沙洲,貼住海邊同鴨脷排連住(退潮時可直接走過去),同時亦係島上最高山峰,而「假玉桂山」位於海怡同利東邨之間,相對較內陸同較矮。

4
玉桂山途中沒有任何路牌(除咗黑色塊版外),「假玉桂山」係有大量路牌同你講你去緊玉桂山XD。

正確路線

1

利東站出嚟會見到巴士總站,遠處有兩個站長室,入口就係兩間站長室之間,俾啲信心入去行入去啦。

2

沿住水管上去配水庫,再沿鐵絲網走就係登山口。


3

黑色牌出現!! 有「舒服」、「有繩」、「驚險」,其實如果係行開山嘅其實「驚險」就真係冇特別大問題嘅,不過如果平時只係喺行山徑(例如麥徑)出沒嘅朋友,最好都係行「舒服」、「有繩」好啲,唔好因為佢得196米就當佢冇到,「驚險」其實比逆行麥理浩徑第五段上獅子山嘅路徑要困難。小編去嗰日就撞見「驚險」有人「唔上唔落」引致「塞車」。

4

一切順利大約30分鐘就到山頂。

山頂除咗望晒南朗山、南丫島、海馬樂園、香港仔、班納山等等,另一邊仲係鴨脷排添!


由呢度開始要特別留意! 因為如果你係因為某假嘅報導而嚟嘅話,係有機會中伏! 由山路落鴨脷排去嗰個「隱世燈塔」(未去過以為每3000年先露出水面1次),係要經過連島沙洲(即係垃圾灘啦),攀上石坡入鴨脷排山徑,沿山脊穿過叢林先到,而中間個沙洲,係退湖先會露出水面! 所以有心去嘅朋友,唔理你幾好體能,請先查清楚該區潮汐漲退時間預好時間先出發!

潮汐每日兩次,上香港天文台「香港各地點的潮汐預報」網頁就會CHECK到!

傳送門