超多聖誕限定!大阪環球影城聖誕直擊!
超多聖誕限定!大阪環球影城聖誕直擊!
相關信用卡:

超多聖誕限定!大阪環球影城聖誕直擊!

發表日期: 2016 年 12 月 30 日 更新日期: 2016 年 12 月 30 日 旅遊
作者:Salad Ho 沙律

日本聖誕節氣氛一向都濃厚,如果你會去大阪玩,就一定唔可以錯過大阪環球影城!開園十五周年嘅大阪環球影城今年聖誕特別熱鬧。而家至2017年1月9日,日本環球影城 USJ 舉行緊一眾限定聖誕活動,除咗有活米村飄雪、世界第一光之聖誕樹、15週年“Happy Surprise”歌舞表演外、聖誕限定花車巡遊、仲有聖誕版「Minions 爆谷筒 」同埋大量聖誕限定精品。而家逐個check point同你捉!

1)The Wizard World of Harry Potter(聖誕特別版)

日期:2016年11月18日(星期五)~1月9日(星期一)

今年喺 Harry Potter 園區第一次參加USJ聖誕節活動,活米村各店家都佈置晒聖誕燈飾、裝飾,七彩繽紛,而且仲會飄雪㗎,聖誕氣氛超濃!

哇!電影中嘅活米村聖誕樹啊!如果你買咗「神奇魔杖」,就可以參與魔法體驗,跟園內魔法師一齊喺聖誕樹前揮動魔杖唸咒語,就可以用魔法,移動飾物同點著聖誕樹彩燈,終於可以由麻瓜升level喇!

另外可以挑戰今年春天先登場嘅新娛樂設施「魔杖奇幻 Wand Magic」。用「神奇魔杖」跟園內魔法師一齊揮動魔杖同唸咒語,屋頂會噴火外,四周圍仲會雪花紛飛,現場人人都睇到哇哇大叫。

另外,Harry Potter 園區內嘅三根掃帚餐廳仲推出咗聖誕限定大餐同食物。

三根掃帚餐廳戶外用餐區可以欣賞到霍格華茲城堡美景,天氣好嘅話仲可以見到城堡湖中倒影呢。

今個冬天限定供應嘅聖誕盛宴,約3-4人份量,包括咗烤雞、chiporatasoseji、薯仔、青豌豆、紅蘿蔔、小捲心菜、肉汁同花園沙律。

超受歡迎嘅忌廉啤酒,依個季節先飲到暖笠笠版本咋。

三根掃帚餐廳、豬頭酒吧同移動攤車都有得買忌廉啤酒,人頭湧湧呀。 2) 世界第一光之聖誕樹 日期:2016年11月11日(星期五)~2017年1月9日(星期一、公眾假期)

呢棵聖誕樹就巴閉喇,榮獲健力士世界紀錄™認證爲「Most lights on an artificial Christmas tree/使用最多電光裝飾的人工聖誕樹」(53萬4280燈泡,截止2015年12月17日)。日頭未亮燈已經好壯觀,夜晚亮燈後係超壯觀!仲屬於係「一生人中想看一次的聖誕樹第一位」!不過今年係佢最後一年展出,大家千奇唔好錯過,記得打卡。 3)15週年“Happy・Surprise”聖誕表演 日期:即日至1月7日 10:30至12:00(每20分鐘1場) 地點:園區內露天大型舞台

家長同小朋友一定好鍾意呢個show!USJ成班朋友仔一齊載歌載舞,換上聖誕裝束,呼喚聖誕老人出嚟一齊玩,氣氛超級歡樂!如果有帶小朋友,你哋可以坐到最前嘅草地。

Minions一出場,全場觀眾即起哄,果然係人氣王。

聖誕表演到最後,Dancers會落台同小朋友互動同跳舞,仲會派小禮物㖭。 4)聖誕限定小食

Christmas Re-boooooooorn! Market內有唔少特別聖誕限定小食,造型好特別,仲有抽獎玩!

聖誕限定Elmo包,造型似足聖誕老人咁留咗白鬍鬚。餡料係日式角煮豬肉,550yen。

聖誕限定Minions包,造型加上聖誕帽,超可愛!餡料係日式角煮豬肉,550yen。 兩個包有手掌咁大,而且熱辣辣,好軟熟。喺咁凍嘅天氣下當暖包拎住已經超滿足。食落好足料,香軟多汁。 -Churros「西班牙脆條」車仔檔

車仔檔做緊聖誕限定抽獎!只要買1條Churros,你就可以參加抽獎,轉動輪盤之後,只要指中「Win」,就可以拎走一Set6條Churros聖誕套裝。

夠好運嘅話,一支Churros價錢就可以換到6支Churros。禮盒仲可以當帽戴。

Churros「西班牙脆條」比想像中冇咁油膩,幾清淡同有咬口!上面嘅醬就比較甜,不過混合一齊食又幾好味,令人忍唔住一啖又一啖。 5)USJ十五周年大巡遊

每天下晝大約二點半會上演一場USJ十五周年大巡遊。所以好多人都會提早霸定靚位。歷時約四十五分鐘。

Minions、Elmo、Snoopy、Hello Kitty等卡通人物,連同熱情十足嘅表演者會坐住花車沿住巡遊路線同大家見面,仲會同觀眾作互動!氣氛超好。

巡遊隊伍會於特定區域停低,花車會噴出大量泡泡同彩紙,觀眾就可以乘機同舞蹈員及卡通人物載歌載舞、影相,將現場氣氛推上高峰。 6)聖誕限定禮品 玩完食完當然就輪到Shopping啦!USJ裡面嘅禮品店紛紛換上聖誕裝潢同聖誕限定貨,公仔、曲奇、Tee、文具等等包羅萬有,等住你帶返屋企。

聖誕Bob餅乾禮物盒,現場小朋友最愛,3200yen。

最受歡迎嘅聖誕限定爆谷筒,今次冇得發聲,但個禮物盒會彈出一隻獨角獸,好搞鬼!3,200YEN

 

另外亦有其他卡通嘅精品,如Snoopy、Hello Kitty、Elmo等等。幾乎人人都戴住個聖誕限定頭飾應節呢。 想體驗最濃厚最歡樂嘅節日氣氛,去大阪環球影城係不二之選!四圍都係一片歡樂景象,係情侶、朋友、一家大細最想去嘅地方! 大阪環球影城 聖誕限定期間:而家至2017 年 1 月 9 日

營業時間:約08:30~21:00(每天不同,請往網站查看)

門票價錢(視乎日子而定):

1天周遊劵:

成人[12歲或以上]:6,852yen

小童[4~11歲]:4,612 yen

長者[65歲或以上]:6,158 yen

2天周遊劵: 成人[12歲或以上]:11,528 yen

小童[4~11歲]:7,797 yen

Express門票:

體驗3個人氣娛樂設施:6,389yen~12,223yen 體驗4個人氣娛樂設施:4,167yen  ~7,500yen 體驗7個人氣娛樂設施:6,389yen ~12,223yen 地址:大阪府大阪市此花區櫻島2-1-33

電話:0570-20-0606 交通指南(電車):JR夢咲線環球影城車站步行即抵達 網址:https://www.usj.co.jp/hk/