資訊爆炸

資訊爆炸

相關信用卡:

資訊爆炸

發表日期: 2013年8月6日 更新日期: 2013年8月6日 生活

作者:水公主

呢排成日放假先落雨,真係要嘆一句「唔通連個天都唔鐘意我」?(返工呢幾日又鬼死咁好天)為免濕身冷親跣親,相信好多人都會選擇同水公主一樣——假日乖乖地留係屋企。問題係,週末、屋企,有咩娛樂?

電視——《x姐有請》入面三位主持做咩係咁狂笑?我冇經過正式計算,單憑印象真係覺得佢地三個笑多過講資訊/介紹食物。加上唔知點解覺得佢地三個既笑聲唔多溫韾……好啦,都係上網追返劇算……呢期就緊係要煲《沖上暈消2》啦!Sam哥同Cool魔好正!!但其實我唔係好記得上集劇情,又唔太想睇喊極都喊唔出既法拉,再加上預計到將來劇情發展走向都係累贅既感情線上無限延伸……嗚呀,即係逼我熄電視架姐?
卓盈BB仲比摩擦力好強既網民發現其實好鐘意食薯片(圖片來源:TVB)

電話——用手機上陣網玩一陣轉珠遊戲(利申:水公主我玩《Puzzle and Dragons》),唔覺唔覺又冇電……但係又唔可以一邊叉電一邊玩,因為最近D手機會爆炸、會爆炸、不斷爆炸!嘩巧驚驚呀……咁好啦,唯有落床玩煮飯仔……


轉又轉又轉原地在轉……睇黎要打機,要幫手機貼埋退熱貼先得

煮飯——炒菜又話釋出唔知咩毒素會生癌,食豬食雞有流感;食牛都可以有瘋牛症;魚又話有孔雀石綠;蛋又話係假既;公仔麵又無益……天啊,我仲食得乜?

原來係香港……要搵樣室內娛樂都咁困難,到底資訊爆炸係好事定係壞事?突然感性,覺得這是資訊最好最豐盛的年代,亦是最壞最一無所有的年代……