賀喜春折之糕GOGO篇

賀喜春折之糕GOGO篇

相關信用卡:

賀喜春折之糕GOGO篇

發表日期: 2014 年 01 月 11 日 更新日期: 2014 年 01 月 11 日 飲食

作者:Lady C.

「恭喜老爺!賀喜夫人!」新年必做嘅除咗同親朋戚友講一堆賀詞之外,當然係食‧糕‧點啦!要食靚糕,向來都係早買的鳥兒有平價!娘親問起,今年用職員價買好定用信用卡折扣買好,照慣例,先夾價再決定是常識吧!去表!

賀喜春折信用卡糕點折扣一覽


心水清嘅卡友,當然一眼就睇得出個表同銀行貼出嚟嘅折扣資料好似有多少出入?!冇錯,因為Lady C.係針對糕點折扣計數,好似中銀 X 鴻星海鮮酒家個優惠咁,銀行推廣寫係低至58折,但今次目標係買糕唔係買蠟腸,所以實數其實係67折!我盡量將每個優惠計清楚,但如果都仲係有甩漏,希望大家提點提點,多多見諒!

精選1) 星展 X 富豪酒店 / 匯豐 X 美心



目前嚟講,講至靚折扣就非星展卡莫屬52折買到富豪酒店三星拱照賀年禮盒(包括瑤柱臘味蘿蔔糕、椰汁年糕及清香馬蹄糕),原價$438,實數$228。Lady C.我計過同匯豐卡去美心買3底同類糕嚟計,逢星期五、六及日7折後再95折,即計落每底約$78左右,加埋都唔夠星展呢個優惠平(頭盔定先:冇計件糕大細重量,純以一底底計)!但美心又真係幾乎全港18區都有分店,無論係買現貨或買券之後拎都方便就真!

精選2) AEON X 鴻福堂 / 匯豐 X 東海堂



其次係AEON X 鴻福堂買糕56折,正路嘅年糕、馬蹄糕、蘿蔔糕同較有特色嘅燕窩楊枝甘露糕都有得平。Lady C.見識少,成日覺得鴻福堂係食唔知有冇龜嘅龜苓膏,從冇幫襯過佢買糕,真係唔知好唔好食唔敢亂買。穩陣嚟講,會寧可選擇匯豐獎賞錢以58折換東海堂北海道元貝蘿蔔糕、紫薯黑糖年糕!想必大家之前喺最紅冬日賞都賺唔少獎賞錢,用嚟買糕正好!可惜推廣去到1月14號,真係要快手換

精選3) 恒生 x 聖安娜



恒生全數用Cash Dollars買糕有68折
優惠,比起其他推廣,普通啦!可能Lady C.我閱讀理解能力低啦,總係覺得恒生搞到件事好似有少少複雜。簡而言之,全數用Cash Dollars買聖安娜糕係當中至抵。果個咩$10當$20用推廣,只要睇實數就知計出嚟係7折。即係話,唔夠Cash Dollars俾全數,就1月17日前碌卡買,1月18日後就用Cash Dollars加錢買先抵。至於說好的職員價比較……只可以話同全數Cash Dollars所得折扣差唔幾,我就建議佢用職員價買,事關間唔中Cash Dollars可以用唔錯嘅折扣買禮券,用嚟當新年禮物送俾親戚咪幾好!

平,當然係一個Selling Point,不過我始終覺得買糕係視乎食開邊間糕而買好啲。新年流流,大家都唔想食到唔啱口味嘅嘢,中伏咁慘慘豬吧?最後一提,東亞 x 景樂集團裡面有隻港式鴛鴦咖啡糕、四川麻辣腸蘿蔔糕,有冇人以前試過,可以提供賽後報告?