買iPhone 6賺超市現金券賺回贈

大陸開賣iPhone 6，炒風漸漸冷卻，用家開始可以Reserve買到機 (6機會較大，Plus仍然被秒殺)，有電訊商亦可以唔使預訂直接Walk-in上台買iPhone 6。有銀行就喺呢個時候做買iPhone 6嘅優惠，睇嚟佢哋都有計過數。

由即日起至10月31號，用Citibank信用卡去IFC、希慎廣場、又一城嘅指定商舖 (即係Apple Retail Store，唔包括同一個商場入面嘅連鎖電器舖) 買iPhone 6，單一簽賬滿$6,388 (iPhone 6 64GB、6 Plus 16GB) 就送$100超市現金券，簽滿$7,188  (iPhone 6 128GB、6 Plus 64GB) 或$8,088  (6 Plus 128GB)，就送$200超市現金券。不過炒家唔使諗住狂賺超市現金券當幫補炒價，因為每個客戶最多只能賺$200超市現金券。

如果覺得超市現金券唔夠吸引，想賺下里數，可以試下去豐澤，而家佢每朝10點都玩預約，亦可以揀定顏色型號，每次預約1部，唔使好似第一次預約咁先到先得，亦唔需要用電話Send SMS拎Code，只要係「易賞錢」會員就OK (不過要係6月30號前註冊)。但係豐澤預約比Apple reserve更難玩，因為成日都塞爆晒，唔係咁易入到預約網頁，Load到入去多數剩返iPhone 6 16GB同128GB。當然，唔好忘記喺豐澤買機係可以賺「易賞錢」積分 ($10=1分)，而「易賞錢」可以換Asia Miles里數 (400分=100里數)，每日預約一部，唔知呢個會唔會成為機票黨另一個開源方式呢？

另外，喺豐澤買可以賺埋信用卡合作優惠，例如用渣打信用卡單一簽賬滿$3,000或以上，就有5%或15%現金回贈，以最平嘅iPhone 6 16GB計，最少賺$250，最多賺$750。