I.T 有賣同代理唔少潮牌，例如A BATHING APE、CAMPER、McQ Alexander McQueen、FRED PERRY，亦有唔少香港本土自家設計，都係年青人同潮人最愛。以前Citibank出過一張I.T信用卡，去 I.T 買嘢會有折，喺學生界特別受歡迎，不過喺今年年初已經停用，令一眾Fans若有所失。所謂「舊嘅唔去，新嘅唔嚟」，I.T 有新聯營卡出，係同美國運通合作嘅 I.T Cashback卡。
I.T Cashback卡個設計同Blue Cash卡 (右) 類似。
主要優惠
呢張卡最主要嘅賣點，當然係I.T優惠，包括：
－全年正價貨品88折
－I.T VIP會員85折
－折扣貨品再95折
－卡主生日月份及之後一個月內 I.T 同 I.T 旗下指定專門店正價貨品85折 (淨價滿$3,500或以上75折)，i.t 同 i.t 旗下指定專門店正價貨品85折 (淨價滿$2,000或以上75折)，I.T 自家品牌正價貨品8折 (淨價滿$700或以上75折)
要留意全年88折、VIP 85折同折扣貨品95折唔適用於BAPE、BAPE Kids、:CHOCOOLATE、公價貨品同寄售貨品；折扣貨品95折同生日優惠唔可以同其他優惠一齊用。
至於邊啲專門店可以用優惠，可以參考呢度
1%現金回贈 睇戲85折
至於基本簽賬獎賞，呢張卡喺本地同海外簽賬都有1%回贈。全年簽賬$48,000或以上，有$400週年獎賞回贈，全年簽賬$98,000或以上就有$1,000回贈，可以當係Cover年費。另外去百老匯、PALACE 及 AMC戲院睇戲都有優惠，喺售票處或網上買3D同2D戲飛有85折。
迎新送禮券及限量版猿人毛巾
迎新方面，新卡首年免年費 ($980)，頭兩個月簽滿$6,000送$500 I.T 禮券，經網上成功申請送1張戲票換領券，可以換2張免費電影戲票 (百老匯、PALACE 及 AMC適用，價值$170)。比較特別嘅係嗰條限量版A BATHING APE沙灘毛巾，圖案設計到好似美國運通白金卡卡面咁，中間人頭就變咗猿人頭，Fans會唔會為咗佢而出卡？想要就要喺8月31日或之前出卡同換領。
條A BATHING APE沙灘毛巾都幾特別。
與其他現金回贈信用卡比較
新卡同現有Blue Cash信用卡都係玩現金回贈，咁其實邊張卡好用啲？我做咗少少比較，睇返兩張卡嘅基本優惠其實差不多，只相差在 I.T Cashback卡係主打I.T 優惠，Blue Cash信用卡有指定餐廳同旅行社優惠。迎新一張送 I.T 現金券，一張送百佳現金券，簽賬要求一樣但金額禮券相差$100。另外週年獎賞回贈亦有少少唔同，一年簽唔夠$98,000的話，I.T Cashback卡簽$48,000回$400，BlueCash簽$58,000回$500。
總括嚟講，呢張卡都係為 I.T Fans而設，如果你係走在潮流尖啄，嗜好係買衫買鞋，出返張應該可以幫你慳唔少。如果唔係特別鍾意買靚衫，一心想賺多啲現金回贈，就可以揀其他1%現金回贈信用卡，例如大新ONE+信用卡、Citi Cash Back American Express Card (餐飲2%)、渣打行政人員白金信用卡 (海外簽賬2%)、安信EARNMORE白金卡等等。
