西灣河太安樓 最新食店試食報告

住港島嘅朋友相信一定知道太安樓係一個掃街嘅好地方啦，我哋之前都有介紹過太安樓嘅掃街推介，新一年我哋重遊舊地去搵一啲新嘅小食店試下佢哋到底正唔正啦！今次我揀咗三間，分別中日韓都齊晒，應該點都有一個啱你哋口味嘅！
 

100%韓國人 -  K Star Food

地址： 西灣河筲箕灣道57-87號太安樓地下A25A號舖
食物：年糕串 $10
個人評分 :  ★★★☆☆  (5星滿分)

▲依間K Star Food就唔係真係K Pop Star，但真係100%韓國oppa開㗎！所以佢哋整嘅食物一定夠晒韓國地道風味！

▲依個就係去到韓國一定會食到嘅年糕串，一串$10蚊有5條年糕，而佢嘅醬汁一啲都唔少，有甜甜辣辣嘅味道！而佢嘅年糕最特別就係先會煎一煎有外脆內軟嘅感覺，同平時係香港其他小店唔同㗎！

 

回味率極高 -  桜

地址： 西灣河筲箕灣道57-87號太安樓地下A37舖
食物：加拿大海膽手卷 $45
個人評分 :  ★★★★★  (5星滿分)

 

▲每一個可以掃街嘅地方點會少得賣手卷嘅鋪頭呀！但依間手卷店係我食過數一數二好味嘅店！

▲試一間剌身店當然要試下佢哋嘅海膽新唔新鮮啦！如果你哋係海膽迷就可以揀手卷內嘅海膽格數，睇下你地對海膽嘅熱愛同需求程度啦！我自已就覺得三格比較貴，加上想試下佢到底好唔好味先，所以就叫咗一格嚟試下啦！

▲其實一格份量都唔少，加上佢手卷飯入面都會有少量海膽，味道唔會咁齋，佢嘅海膽係加拿大海膽比較大片，味道超超超鮮甜口感好滑，其實依個算係我掃街食過最有誠意嘅海膽手卷，雖然佢嘅價錢唔算平，但性價比十分高！

 

超鮮味子餃 -  百川手工餃子

地址： 西灣河筲箕灣道57-87號太安樓第三街A61A號舖
食物：招牌三鮮(6隻) $20
個人評分 :  ★★★★☆ (5星滿分)

▲平時手工餃子店唔會好多，依間百川係太安樓嚟講係比較新嘅！鍾意餃子嘅朋友一定要試下！

▲佢哋所有餃子都係全人手手工製造嘅，餃子皮都唔同一般嘅餃子一樣！

▲招牌三鮮餡料有鮮蝦、豬肉、雲耳、雞蛋、京蔥。佢嘅份量比例豬肉比較多，而佢嘅餃子皮比較厚，十分有咬口，所以比一般嘅餃子容易飽肚！餡料加入雲耳同京蔥令到餃子鮮味比較出、而手工餃嘅優點就係無味精同唔會好鹹！