藝人爭住生B 旺丁風水屋你要知
藝人爭住生B 旺丁風水屋你要知
相關信用卡:

藝人爭住生B 旺丁風水屋你要知

發表日期: 2017 年 02 月 07 日 更新日期: 2017 年 02 月 07 日 生活
作者:甦師父

近排好多藝人都話想生小朋友,生唔切「雞仔」都要生「狗仔」同「豬仔」。但想一回事,成唔成功造人又係另一回事。喺簡單嘅風水角度嚟講,單位座向有分係咪旺丁旺財,對生小朋友機率可能有影響。猴年尾開售嘅新盤撐起樓巿,令二手樓交投相形見絀,到底啲新盤單位有幾多係丁財兩旺,適合生B呢?

 

眾多藝人想生B

 

雞年伊始,同已婚或已拍拖嘅人拜年時被長輩「關心」一樣,幾時生B係唔少記者問藝人嘅必問題。

唔少藝人都大方回答架,好似已生咗3個女嘅阿Bob,就話急住造人想生「雞仔」,不過生仔生女就冇所謂。老婆年屆35了,阿Bob話今年追唔到就同老婆正式「收壚」。其他已婚藝人如范振鋒、王祖藍同李亞男兩公婆都想未來1至2年生狗仔豬仔。

不過結婚生仔呢啲事,有藝人選擇低調處理。好似舒淇同馮德倫咁,係公司向傳媒發放婚照,婚事先正式通天。之後傳媒發現佢哋花20萬月租淺水灣豪宅短住,又傳出舒淇有身孕,不過2人否認。

查實呢兩公婆本來住喺南灣嘅豪宅,因為要裝修,先至租住淺水灣單位先。大家都知道,家居裝修後發出嘅有害化學物質影響胎兒同BB成長,佢哋會唔會等裝修完,啲化學嘢又散晒,就返去南灣屋企努力造人?

 

▼Bob已有3個女了,仲想雞年生多個。唔怕啦,咁多job,養得起。

 

座向正確 丁財兩旺

 

知道咁多藝人打算生B,我甦師父衷心祝佢哋早生貴子。眼見年尾一手樓交投活躍,唔少年輕夫婦趕買樓結婚生仔,真係想提醒吓佢哋,喺風水上,單住座向有分旺丁旺財同損丁傷財等之別。無論係已婚藝人定尋常夫妻,喺租樓買樓前,記住要注意啊。

住宅單位座向,簡單啲嚟講即係單位大廳窗戶向外對住嘅東南西北方向。如果大家租樓買樓前唔知座向向邊,可以參考番平面圖,或者睇樓時用羅盤測度。

今年同打後好幾年係風水上嘅「八運」,將座向對照下面24個「山向飛星局」座向,即可粗略得悉單位係丁財兩旺,定破財損丁:

 

 

唔識咩子丑寅卯方位唔緊要,下面為大家計埋相應度數,咁就用有刻度嘅指南針都睇到單位座向啦:

 

 

 

舉個簡單例子畀大家,如果單位座向係正北(352.5至7.5度),就係「坐午向子」或「子」,風水上就係「旺丁破財」,但係座向稍為向西至「壬」(337.5度至352.2度),咁就係「旺財損丁」嘅單位喇。所以,東北偏北、東南、東南偏南、西南偏南、西北同埋西北偏北座向都係「丁財兩旺」嘅單位。差之毫釐,可以謬之千里,大家測度座向時要小心!

 

啟德1號(II)最旺

 

一手樓銷售數字撐起成個樓巿交投,二手樓巿乏人問津。趕喺猴年年尾開售嘅3個受注目新盤:元朗Grand YOHO第2期、啟德「港人港地」啟德1號(II),同埋荃灣柏傲灣,全部銷情理想,咁到底呢3個新盤有乜單位係丁財兩旺呢?

據佢哋售樓書所顯示嘅單位樓面平面圖可見,最多丁財兩旺單位嘅係啟德1號(II),有座向西北嘅D、E、F、G單位,亦有座向東南嘅A、B、J、K單位。至於Grand YOHO第2期嘅F、G同部分E單位向西北,丁財兩旺。荃灣柏傲灣嘅單位座向唔係正西就係正南,就冇上述嘅丁財兩旺嘅風水了。

 

▼啟德1號(II)單位唔少都係丁財兩旺

 

▼Grand YOHO

 

為免座向有出入,建議大家睇樓時再睇多次單位座向。

最後都要講返句,旺唔旺丁旺財,好睇大家身體同運氣嘅,風水玄學嘅嘢,信則有,不信則無啦,最多作個參考好了。