藍色牛奶湯底你試過未?觀塘工廈日系小店探秘

藍色牛奶湯底你試過未?觀塘工廈日系小店探秘

相關信用卡:

藍色牛奶湯底你試過未?觀塘工廈日系小店探秘

發表日期: 2016 年 09 月 30 日 更新日期: 2016 年 09 月 30 日 飲食

作者:Stella Yeung

觀塘工廈區咖啡室,閒閒地都十幾廿間,唔少都有特別主題,相信已經成為唔少人假日去Hea嘅好地方。喺機緣巧合之下,小妹就發現咗一間同自己好有緣嘅小店--Interstellar Studio。點解有緣,因為大家個名都有「Stella」吖嘛!哈哈……

唔好講咁多!立即跟我上去探秘啦!去片!

食完好西(食品介紹請睇上面條片),梗係要同老闆阿軒(Hinny)傾下偈啦:

1. 你哋點解會開呢個Studio嘅?有咩經營理念?

首先,因為Interstellar本身係我自己嘅一個Brand,所以開呢間店嘅時候都希望想將自己嘅思維Group埋一齊。我細個成日幻想,好鍾意「星際」同「太空」嘅元素,鍾意嗰種好神秘、科幻嘅感覺,同埋好似外星人等等未知嘅事物,所以就想攞呢個題材融入去自己嗰度。

另外,我越嚟越長大,發覺而家好多電影都講述「根本性」呢個問題,我希望大家喺發展新地方嘅時候,唔好忘記自己嘅本質,呢個係我哋最深入嘅概念,所以我就開咗呢間概念店,將意念分享畀人!

2. 你喺創業期間有咩困難之處?例如有冇資金問題?

其實,最大嘅困難係人手問題,因為自己要讀書同考公開試,所以好多時間都唔夠用,連讀書時間都唔夠,咁又點樣搵錢呢?同埋,我只係一個十幾歲嘅後生仔,能力真係有限,所以好多方面都會停滯,好似身體差咗啦,亦都少咗時間陪朋友同埋屋企人,但我覺得最後都係值得嘅!

而資金方面,我本身就冇問屋企人攞錢,亦冇同財務公司借錢,所投資嘅資金都係賣自家Product賺返嚟,將賺返嚟嘅錢再滾大佢,咁就唔驚會蝕自己好多錢。如果之後生意上有咩擴展,都係會用呢個方法去做。

3. 喺香港持續要營運一盤生意好難,你會點樣平衡經營成本呢?

我而家個生活同我生意上嘅營運已經撈埋一齊㗎喇!因為我哋嘅收入有唔同方面,有啲搞活動搵返嚟,亦有接Freelance,支出同收入都會一邊出一邊入,正常嚟講,係好應該搵一個人去睇住盤數,但無奈我一個人真係做唔到咁多嘢,所以最後都係自己盡量去Balance返囉哈哈!

4. 你哋係九十後,可唔可以同年青人分享一下理財之道?

哈!講到識理財,我自己就唔係一個好例子!如果真係要分享,我覺得你好想嘗試做某件事,如果同屋企人冇好大爭執,都應該去突破,但都要平衡返個利益嘅!

5. 你哋未來有咩目標呢?

我想每一樣有興趣嘅嘢都試下,而家呢間店都係以Pop-up形式去做,幾個月之後,都會慢慢轉型,希望變成自己嘅Office,有個更大嘅地方去搞設計、手作同其他Freelance,亦都想Group一班志同道合嘅朋友去發展,如果搵到一啲投資者去Support我哋就更加好啦!

同阿軒傾完之後,真係學到好多嘢,而佢只係得19歲咋!回想19歲嘅自己,日日只係掛住飲飲食食,諗返都有啲汗顏。

如果大家都想試下個藍色湯麵,或者同後生過你嘅老闆一齊思考下人生,就要嚟觀塘喇!啊!記得預約喎!

--------------------

Interstellar Studio

地址:觀塘敬業街敬運工業大廈9/F K1

平均消費:$50-$100(敬請預約)

--------------------