荃灣掃街 • $120內有找
荃灣掃街 • $120內有找
相關信用卡:

荃灣掃街 • $120內有找

發表日期: 2016 年 11 月 23 日 更新日期: 2016 年 11 月 23 日 飲食
作者:Stella Yeung


一直都知荃灣好多好嘢食!但對於住九龍區嘅我荃灣真係超遙遠,所以自己去荃灣嘅次數不足十次!不過唔緊要,要食好嘢梗係要搵我”Stella姐”,所以今次我Stella就衝出九龍去到荃灣搵又正又抵嘅嘢食比大家!講到食,荃灣路德圍附近一帶就係食物集中點,想要咩種類嘅小食都有,真係多到有啲花多眼亂㗎!今次做定功課決定同大家搵啲好平又好食嘅小店啦!


港式懷舊小食 -  十八座狗仔粉

地址:荃灣荃興徑3號地下E舖

食物:馳名狗仔粉 $20

個人評分 : ★★★☆☆  (5星滿分)


▲未食過狗仔粉嘅朋友聽到個名應該覺得好奇怪,點解叫狗仔粉?其實係麵條嘅形狀同狗仔嘅尾巴好相似,所以就叫做狗仔粉啦!麵嘅質感好似好腍嘅烏冬咁,湯底都好濃,另外可以自己加菜脯,有辣同唔辣,任君選擇!

 

 

超級炸雞脾 - 三多炸肶

地址:荃灣青山公路荃灣段227-287號運通洋樓地下B舖

食物:三多炸雞肶 $29

個人評分 : ★★★★★  (5星滿分)


▲依個三多炸肶真係不得了,佢地係即叫即新鮮炸,雞脾係超級大隻!仲好貼心有個手套提供添!雞脾外皮炸得超香脆,而雞肉真係估唔到咁滑完全唔覺得炸過嚟,肉質嫩滑之餘,調味又香又惹味,好正呀!

 

 

超抵芒果汁加棉棉冰 - 泰芒了

地址:荃灣路德圍26-28號安富大廈地下4B號舖

食物:大芒果 $35

個人評分 : ★★★☆☆  (5星滿分)


依杯仲大過我塊臉嘅大芒果只需要$35(優惠期間),先唔好計味道價錢已經贏晒啦!大芒果入面有超過4塊大塊嘅芒果片、芒果汁、芒果棉棉冰、cream。芒果果肉幾甜、芒果汁雖然唔係好濃嘅果汁味但都唔會太淡,幾開胃㗎。而最驚喜就係棉棉冰啦,本來我以為係沙冰但發現原來係好香滑嘅棉棉冰,整體嚟講依杯大芒果真係好抵呀!

 

 

青衣戲棚一日賣過千件 - 蠔得喜

地址:荃灣建明街7號昌華大廈地下15C-2號舖

食物:煎蠔餅(細) $28 ,秘製醬爆蝦米腸 $22

個人評分 :
煎蠔餅                  ★★★☆☆  (5星滿分)
秘製醬爆蝦米腸  ★★★★☆  (5星滿分)


▲依個份蠔餅就係傳說中係青衣戲棚一日賣過千件嘅煎蠔餅啦!有好多醬可以選擇,甜醬、辣醬、魚露、胡椒粉同芫茜,可以配合不同客人嘅口味。我發現原來蠔餅加甜醬係超好味㗎!蠔煎唔會煎到好油,蠔都好大粒又唔腥,鍾意食蠔餅嘅你地一定會啱口味!

 


▲另外老闆推介咗依份秘製醬爆蝦米腸 ,一般蝦米腸嘅蝦米會連住腸粉,但依間嘅蝦米腸就係蝦米同腸粉分開炒,食落腸粉質感唔只滑好多,啲蝦米味仲出晒嚟?!而佢地嘅秘製醬有少少辣,但唔會同一般外面嘅XO辣味相同㗎!大推!