中資企業頻頻高價投地,搞串個party,有專家預期地價貴,樓價中短期唔平得去邊,有報道指,扣除未補地價居屋同公屋,低於$400萬的上車盤已經唔夠1,000個,9成按揭快成絕響,打工仔日後更難上車。
喺愈嚟愈少嘅上車盤中,上車屋苑已經買少見少,本來的上車恩物嘉湖山莊,近期出現過$10,000呎成交個案,單位隨時售價過$400萬,已經唔再係名副其實的上車屋苑;而牛頭角得寶花園呎價都升穿$12,000,300幾呎樓隨時過$400萬,亦可能無緣做9成按揭!
不過香港屋苑多,總有滄海遺珠,荃灣中心實用呎價$11,152,而且唔少單位300幾實呎,計埋售價$300萬尾$400萬唔使,喺中原睇,放盤數都有幾十個;同呎數的得寶單位做唔到呢個價,而嘉湖山莊因為實呎唔少都係400呎以上,$400萬樓下上車盤唔多,所以全港大型屋苑中,好可能剩番荃灣中心先係仲有唔少上車盤的大型屋苑。
(中原網頁截圖)
金管局只容許$400萬以下單位有機會做到9成按揭,條件包括首次置業、固定收入同供款佔入息比率不超越45%等。
就以荃灣中心324呎、$360萬的單位為例,做9成按揭,供30年,利率2.15%,首期要$36萬,每月供款大約$12,220,唔計按揭保險費,月入$32,166就過壓力測試。
不過荃灣中心唔近荃灣地鐵站,居民出入都靠搭程3至5分鐘一程的小巴轉搭地鐵,交通唔算好方便。但係諗諗吓,樓價唔似會跌,既然$400萬上車盤快要絕跡,而金管局未有意放寬按揭限制,大家趕上車的,唔知會唔會把握機會,趁機手入呢個全港僅餘的上車屋苑呢?
▼荃灣中心同荃灣站有段距離,居民主要乘搭小巴接駁搭地鐵
荃灣中心小檔案:
入伙日期:1982年8月
座數:19座
單位數:4,516個
2月實用呎價:$11,152
發展商:新鴻基
管理公司:啟勝管理服務有限公司