更新日期: 2017 年 03 月 23 日
喺呢個盛行芋圓乜乜乜嘅世代,主打芋圓嘅甜品店亦愈開愈多,但質素就十分參差。最近就連抹茶雪糕甜品店點點甜Ideas Dessert,亦推出春季限定芋圓甜品,身為芋圓控嘅小編即刻點咗3款甜品試一試佢!
甜品系列一共有7款,小編就最推介當中嘅芋泥奶凍冰($32)
最滿意係奶凍和芋泥!奶凍夠晒香滑Q彈,而芋泥係店員每日開店前人手蒸熟以及壓成粒狀,絕對真材實料,所以完全唔會有一般泥膠口感。芋頭味唔假,仲食到微細芋頭粒。另外,糖水奶味非常濃郁~係3款甜品之中最甜兼味道最突出的,所以如果你比較嗜甜/重口味就啱晒你了~
芋圓仙草盛配芋泥(可選芋泥/紫番薯泥)($30)
店員表示呢款係最受食客歡迎的,而原因當然是因為材料和賣相都十分豐富!因為先前的奶凍冰已經有芋泥,所以呢款本來係想試紫番薯泥的~可惜已經沽清,無緣試到T.T
而呢款配料種類最多,芋泥配合芋圓、西米、地瓜圓、紅豆、黑珍珠等,食落爽滑煙韌,口感夠晒豐富~底下的仙草則水漾彈滑,唯一缺點係要自己cut開。糖水不會太甜,飲落清甜帶仙草香。
薑汁芋圓西米露(可選凍/熱)($26)
呢個西米露賣相比較普通,但卻是最健康(建議點熱食)!芋圓配薑汁好啱寒底或是生理期中嘅女仔食,可以暖身行血或改善手腳冰冷問題;而薑汁味道適中唔會有辣感,糖水甜度偏淡,感覺養生又滋潤。
雖然芋圓唔係特別有驚喜,但勝在每款都好有特色,唔係周圍都可以食到!