與中村藤吉齊名:抹茶甜品名店茶寮都路里

與中村藤吉齊名:抹茶甜品名店茶寮都路里

相關信用卡:

與中村藤吉齊名:抹茶甜品名店茶寮都路里

發表日期: 2017 年 01 月 31 日 更新日期: 2017 年 01 月 31 日 旅遊

作者:Salad Ho 沙律

茶寮都路里係抹茶甜品名店,同香港人最愛嘅中村藤吉齊名。佢係京都有名茶莊老店「祇園辻利」嘅子品牌,辻利祇園本店早於1860年創業,專賣各種日本茶葉,長達半個世紀對抹茶品質同口感都抱住始終如一嘅堅持。

而於1948年,辻利祇園本店開設「茶寮都路里」,創辦人有見日本人日常飲用嘅茶慢慢被咖啡取代,為咗重新令人重視「飲茶」呢個傳統,創辦人於茶寮都路里祇園本店二樓開設飲茶店「茶寮都路里」,喺當時其實唔太受歡迎,所以店家就開始研發出各樣抹茶甜品,係京都抹茶甜品先驅。由於甜品精緻而且用心製造,呢份美味就開始廣傳起嚟,令茶寮都路里成為日本、海外著名抹茶甜品名店。

茶寮都路里於京都有三間分店,其中茶寮都路里祇園本店係朝聖嘅第一選擇!茶寮都路里祇園樓下經常聚集好多人排隊等食,唔想等太耐就建議早少少,我約朝早11點到達,唔使等位就直接入座喇。店面左邊係祇園辻利,右邊樓梯先係通往茶寮都路里嘅入口。

店內以日本和風裝潢為主。一坐低店員就會送上熱茶,而座位旁邊有籃,可以擺手袋等雜物,好貼心。

特選都路里パフェ,1383yen。

我點咗茶寮都路里招牌:特選都路里パフェ,1383yen。呢個甜品幾乎檯檯都會點,嚟到不可不食!對於外觀,我會畀10/10粒星!睇上嚟有層次,而且用料非常豐富!招牌甜品果然唔係浪得虛名。"パフェ"來自法文「parfait」,解作「完美」,用於甜品名係指將唔同口感、味道嘅甜品擺喺同一個杯子裡面享用。

特選都路里パフェ內含11種材料!包含:抹茶生クリーム(抹茶cream)、抹茶カステラ(抹茶蛋糕)、栗甘露煮(蜜煮栗子)、抹茶ゼリー(抹茶Jelly)、抹茶アイス(抹茶雪糕)、小豆(紅豆)、白玉(白玉丸子)、抹茶シャーベット(抹茶刨冰)、バニラアイス(雲尼嗱雪糕)、抹茶みつ(抹茶蜜汁)同寒天。

重點解構特選都路里パフェ美味秘密:


抹茶cream:用抹茶粉混入新鮮忌廉而成,唔肥膩之餘,兩者味道仲出奇地夾!咬落空氣感十足,好似棉花糖咁。

抹茶蛋糕:口感幾似長崎蛋糕,有少少蜂蜜味,建議溝埋下層嘅抹茶雪糕一齊食,軟綿綿嘅蛋糕吸晒半溶嘅雪糕,好幸福!

抹茶雪糕:接近抹茶原味,苦味比較重,唔算甜,但我覺得呢個配搭好完美!因為其他配料已經好甜,食到中段有原味抹茶雪糕稍稍中和一下,可以解解甜膩,好有心思嘅配搭。

白玉丸子:作為丸子達人,呢度嘅丸子果然與眾不同,軟糯煙韌,好有彈性。

抹茶寒天:有淡淡抹茶味,配搭著下層嘅紅豆食就剛剛好!

抹茶控或者第一次嚟,建議即點呢個招牌,十幾樣唔同口感、味道嘅甜品材料一次過滿足你,大滿足!


另外我仲點咗季節限定甜品,都路里ぜんざい,1102yen。

一Set裡面有杯熱熱嘅宇治抹茶、烤日本年糕紅豆湯配蜜蕃薯、蜜栗子。「ぜんざい」即係「善哉」,源自日本神道教重地出雲的「神在餅(じんざい)」。於室町時代,一休禪師食到依個紅豆湯,覺得太好食而大叫咗一聲「善哉!(よきかな)」,「よきかな」即係感覺好好嘅意思,從此依個甜品就叫做「善哉」。

茶寮都路里嘅「善哉」會於紅豆糖水加烤日本年糕、蜜蕃薯同蜜栗子。紅豆煮至軟綿,大致保留豆狀,有少少咬口。食落有少少似香港嘅紅豆沙,不過冇陳皮同蓮子。外香脆內軟糯嘅烤日本年糕好香糯米味,同紅豆、蜜蕃薯同蜜栗子,構成完美配合。成碗湯都幾甜,好彩配上昆布同宇治抹茶,中和甜味。

店中除咗甜點之外,亦有提供少少用咗抹茶製成嘅鹹食,好特別!有興趣可以一試。
清水セット 1,253yen

抹茶蕎麥麵配抹茶雪糕糯米糍。

店內仲有寒天類同丸子類人氣甜品:
団子とわらびもち 1,080yen

一次過滿足食丸子、蕨餅同寒天三個願望,啱晒眼闊肚窄嘅朋友,可以留肚食多啲美食。



都路里ところ天 918yen

用上抹茶雪糕、日式凉粉、丸子、紅豆嘅甜品,伴上抹茶糖漿,清爽口感好Fresh。


茶寮都路里
地址:東山区四条通祇園町南側 573-3 祇園辻利本店 2階・3階
電話:075-561-2257
時間:星期一至四 10:00-22:00(L.O. 21:00)
星期六、日、假期 10:00-22:00(L.O. 20:30)
網址:http://www.giontsujiri.co.jp/saryo/
地圖: