自助餐之外 酒店開餐好地方

一講起去酒店食飯，第一時間會諗起食Buffet。當然，酒店除咗自助餐之外，仲有好多餐廳食肆可以揀，食物都好有水準㗎。

香港怡東酒店ToTT's and Roof Terrace－最正嘅當然後佢個無敵維港海景，佢喺酒店34樓，居高臨下，而且夜晚仲有Live band，食飯飲嘢傾偈都可以好Enjoy。

室外夜景超讚。

香港半島酒店Felix－半島酒店嘅餐廳好多都出晒名，例如大堂茶座嘅High tea、瑞樵閣嘅芝士火鍋、嘉麟樓嘅月餅，吉地士嘅Fine dinning，當然唔少得Felix，Menu以法式及歐陸式為主。位於28樓當然可以飽覽一片維港海景，最特別仲有男士洗手間，男性朋友都講去得真係好爽，不過Lady C.就無緣體驗喇。

維港景色加上Philippe Starck設計嘅環境，內外都咁靚。

菜式由日籍主廚主理，相當精緻。

富豪香港酒店富豪金殿－富豪金殿係米芝蓮星級中菜食肆，好多菜式都曾經獲得旅遊發展局美食之最大賞多個獎項，例如芙蓉黃金蝦、茶皇燻雞等等。

蠔皇扣三頭鮑魚。



金湯珍珠香茜魚蓉羹就得過金獎，「珍珠」其實係蛋白。

港島香格里拉大酒店灘萬日本料理－呢度以懷石料理聞名，懷石料理一共有八道菜，每個月都會按時節轉成時令食材。當然，除咗懷石料理，都有鐵板燒、刺身、壽司、燒物供應。

當然，酒店美食又點止咁少，好多信用卡都有酒店食肆優惠，諗起想去食返餐好嘅，可以去呢度、呢度、呢度同呢度睇下有冇你嘅心水。