聖誕食『蠔』D！ 三井任食生蠔燒蠔

通常食生蠔都要去食自助餐先可以食個飽，但我呢啲又窮又鍾意食生蠔嘅人黎講，次次都要比三四百蚊去食自助餐，隨時要露宿街頭呀！但好彩，近排三井日韓料理就新出咗個任食生蠔燒蠔套餐(＄268/位)，仲包埋前菜、蠔湯、蠔飯同雪糕。如果你係蠔迷，想專食蠔嘅話，嚟呢度食就真係抵曬啦！

• 餐廳環境舒適，雖然未到聖誕，但店內已經佈置得好有聖誕氣氛，仲有大大嘅聖誕樹。

• 店內嘅生蠔係美國蠔或者法國蠔，啲蠔肉又新鮮，又肥美，非常軟滑，再配埋蠔汁，真係要食多幾啖呀！
• 生蠔個人評分：★★★★☆  (5星滿分)

• 除左生蠔之外，仲可以自助燒蠔。店內有燒爐提供，可以自己燒蠔食。
• 而燒蠔老闆就建議用日本廣島蠔。廣島蠔比美國蠔或者法國蠔大，生食同樣鮮甜，但燒過之後更加突出到蠔嘅香味。如果要我比較，燒蠔比生蠔更加好食！
• 燒蠔個人評分：★★★★★ (5星滿分)

• 呢三款醬汁係佢地自己調製的，分別係鰹魚昆布汁、辛香醬同海鮮芝士醬。CC我就推介鰹魚昆布汁，因為佢無辛香醬同海鮮芝士醬咁杰身，所以啲汁好快就可以滲入蠔入面，食落有少少似燒汁嘅味道。

• 蠔飯就咁睇已經好吸引！有熟蠔菇類同蔥喺面，再加埋粒粒分明嘅米飯，真係一個好強勁嘅組合啊！

其實除左任食蠔之外，紫色蕃薯仔同埋蜆都係任食架！全部都係CC我鍾意嘅嘢啊！如果有機會，我下次一定再去食～

三井日韓料理

地址：旺角西洋菜南街1N號兆萬中心3樓301室

營業時間：星期一至日12:00 - 15:00 / 17:00 - 00:00

電話：21511000

付款方式：現金、信用卡