聖誕自助餐推介（港島篇）

無論有冇宗教信仰，喺香港，聖誕節都係一個普天同慶嘅日子，好多人都會大拆一餐慶祝。因為咁，各大酒店嘅自助餐都會喺12月24、25、26停止優惠，仲會加價應巿，除夕夜情況相同。識飲識食嘅你，聖誕又點可以唔食番次自助晚餐「應節」呢？今次我哋就精選咗港島區5間酒店嘅自助晚餐介紹畀大家，仲羅列埋佢哋嘅收費畀大家比較。

 

 

會展：薈景及維港咖啡閣

 

 

會展位置喺正維港岸邊，每到12月，唔少人都會選擇喺佢哋嘅餐廳薈景食自助餐，貪佢有個窗外靚景有聖誕燈飾。就係因為咁，餐廳今年都大打聖誕同新年煙花主題，設有特備嘅魔術表演環節，話要打造「仙幻花園」咁話。咁有咩特別嘢食先？佢哋就強力推介燒馬介休香蔥沙律、印度燒雞、聖誕火雞等等，甜品仲有仙子彩虹奶凍、朱古力水晶球等等。

如果係31號晚上11點至凌晨1點入去，更可以近距離睇除夕煙花，每位只需$228！不過要注意嘅係，佢哋呢個時段嘅餐飲服務係以「倒數派對」形式進行，只提供飲品、甜品同小食。

 

▼聖誕火雞

 

▼燒馬介休香葱沙律

 

▼仙子彩虹奶凍

 

會展喺聖誕檔期唔單止得薈景有自助餐食，佢哋嘅維港咖啡閣專登喺24同25號推出自助餐添，同樣望住維港夜景，但因為31號佢冇自助餐提供，要睇煙花就要去返薈景喇。

 

*另收加一服務費

^12月31日23:00-01:00時段只提供飲品、甜品及小食。

 

*另收加一服務費

 

萬麗海景酒店

 

第2間要推介嘅自助餐係萬麗海景酒店嘅萬麗咖啡室。今期佢哋力推「海洋風咩」，顧名思義緊係有大量海鮮食啦！包括來自愛爾蘭嘅生蠔、叫即蒸波士頓龍蝦、龍蝦意大利飯及黃金龍蝦球等等，此外當然唔少得青口、 蟹腳、蜆及各款時令刺身。

 

▼今期有愛爾蘭生蠔

 

▼唔少得大量海鮮

 

*另收加一服務費

 

城巿花園酒店

 

跟住落嚟要推介嘅係城巿花園酒店嘅綠茵閣。佢哋餐廳雖然唔大，但總算麻雀雖少，五臟俱全。就住嚟緊嘅聖誕，佢哋會推出帕爾瑪火腿煎蝦、香煎蟹餅、迷你和牛漢堡、芒果龍蝦沙律迷你酥皮盒、鮮帶子他他青瓜杯、燒紐倫堡腸配洋蔥、羅蘭仕撻等等，喺自助餐中享受派對小食。佢哋依家有個預訂優惠，只要喺12月12日前訂枱並全數付款，即可享8折優惠。

 

▼精選海鮮：雪花蟹腳、大頭蝦、麵包蟹、虎蝦、法式青口及翡翠螺

 

▼和風瀛人滋味

 

*另收加一服務費

 

南灣海景酒店

 

港島區嘅酒店自助餐主要集中喺港島北，但其實南區黃竹坑南灣海景酒店嘅LIS Cafe都係唔錯嘅聖誕自助餐選擇。可能因為南區出名食海鮮掛，佢哋都主打海鮮食物，另外仲有香港仔魚蛋、廣州雲吞麵等，甚具地區特色。

不過要提提大家，黃竹坑依家仲係一個工廠區，周圍冇商場同商鋪，享受完聖誕大餐後冇得行吓街消化吓，兼且冇乜聖誕氣氛。但佢有度好，就係12月10日前預訂並全數付款可獲8折優惠。

 

*另收加一服務費

 

香格里拉酒店

 

香格里拉酒店嘅Cafe TOO，佢哋每晚自助餐都有10款精選代表菜，包括於鐵板燒櫃檯登場的迷你漢堡以及鵝肝配原隻鮮帶子，壽司櫃檯的即製軟殻蟹手卷，當然唔少得新鮮波士頓龍蝦，同埋其他舖滿海鮮櫃檯嘅大蝦、花蟹、海螺同青口。

Cafe TOO自助餐嘅嘢食豐富，不過聖誕檔期除咗有火雞外，都係仍然主打國際美食，同平日沒大分別。

 

*另收加一服務費

 

邊食邊賺萬里通里數

 

絕大部分酒店自助餐都會喺聖誕檔期暫停信用卡優惠，以上5間酒店都唔例外。不過酒店唔做信用卡優惠啫，冇話亞洲萬里通會喺旺季停咗個賺取里數嘅優惠。

以上5間酒店中，肯及早預訂並全數支付費用嘅LIS Cafe同綠茵閣，本已可享8折優惠，但原來同時有做亞洲萬里通換里數嘅優惠！客人只要在喺呢2間餐廳埋單時出示亞洲萬里通嘅會員卡，只要消費滿$300，即可以每$2換取1飛行里數！

所以聖誕可以選擇到呢兩間餐廳食自助餐，就可以邊食邊賺！